Ինչու է աղմկում գեներալը...
Գժուկներին սթափության կոչեր անող Վլադիմիր Գասպարյանը բոլորին այդ կոչով դիմելուց առաջ անտեսել է իրեն և ոչ սթափ քայլեր կատարել։
Պարզվում է՝ նախքան ոստիկանապետ աշխատելը, երբ զբաղեցնում էր Պաշտպանության նախարարության զինվորական ոստիկանության վարչության պետի և պաշտպանության փոխնախարարի պաշտոնը, որոշ զինվորների ազատել է ծառայության բեռի ծանրությունից ու կարգել Սերժ Սարգսյանի եղբայր՝ Լյովա Սարգսյանի վարորդ, Ալեքսանդր Սարգսյանի թիկնապահներ։
Ու ստացվել է այնպես, որ վարորդ ու թիկնապահ աշխատած տղաները ՊՆ-ից նաև աշխատավարձ են ստացել ու պետությանը պատճառել միլիոնների վնաս, ինչի համար էլ Գասպարյանը կանչվել է պատասխանատվության։
Սակայն Վլադիմիր Գասպարյանն այս քրեական գործի հարուցումը համարել է զավեշտալի այն աստիճան, որ անգամ ցուցմունք չի տվել։
Ու մինչ մամուլն արձանագրում է հերթական կոռուպցիոն բացահայտման մասին հնչեղ հաղորդագրությունը՝ հեռավոր հյուսիսից ազգին ուղղվելու կոչերով է դիմում «բանանի արքա», գեներալ Միհրան Պողոսյանն, ով Ռուսաստանից քաղաքական ապաստան խնդելուց առաջ հարկ չի համարել պոկել գեներալի ուսադիրները։
Տպավորություն է, որ Պողոսյանն իր ու Վովա Գասպարյանի քրեական գործին է հղում անելով հայտարարում՝ շինծու գործերով ու շոուներով ուղեկցվող «ուղեղների լվացումը» օրերից մի օր ավարտվելու է։
«Ոչ մեկը չպետք է հայտնվի քաղաքական վրեժխնդրության թիրախում, առավել ևս պետականաշինության գործում իրական ներդրում ունեցողները»,- իրեն ևս համարելով վրեժխնդրության թիրախ ու պետականաշինության գործում ավանդ ունեցած մարդ՝ ասում է օֆշորներում միլիոններ թաքցրած Միհրան Պողոսյանը։
Պողոսյանն անցել է ինքնապաշտպանության՝ «ձեռքի հետ» պաշտպանելով նաև երբեմնի ընկերներին՝ իրեն կապող թելի ծայրը չկորցնելու համար։
Չի բացառվում, որ մեկ հայտարարություն էլ Միհրան Պողոսյանը տարածի Գագիկ Խաչատրյանի և այլ հայտնի դեմքերին առաջադրված մեղադրանքների մասին հաղորդագրությունները կարդալով՝ իր հերթին թեժացնելով աշունն արդեն դրսից։