«Կանգնիր, կկրակեմ»․ ինչպես են պարեկները «ճռռիկներով», ցուցանակ տապալելով ու սյունին հարվածելով, հանրային տարածքում հետապնդում մեքենան (տեսանյութ)
Պարեկներն իրապես փորձանք ու պատուհաս են դարձել թե՛ վարորդների, թե՛ շարքային քաղաքացիների համար։ Որքան էլ փորձեն վարդագույն գույներով ներկայացնել նրանց կատարած աշխատանքն ու համոզել, որ առանց նրանց չէինք կարող «գլուխ հանել»՝ փաստերն այլ բան են ցույց տալիս։
Իբր քիչ են նրանց պատճառով առաջացած արհեստական խցանումներն ու վթարները՝ պարեկներից շատերն իրենք են ստեղծում վթարային իրավիճակներ։
NEWSPRESS.am-ին է հասել տեսանյութ, որտեղ երևում է, թե ինչպես են պարեկները, ցուցանակը ջարդուփշուր անելով ու անթույլատրելի արագություն բացած, փորձում իբր կանգնեցնել ինչ-որ խախտում արած՝ «Վազ 2101» համարանիշով մեքենա։
Դեպքը տեղի է ունեցել Նուբարաշենում։ Մեզ հասած տեղեկություններով՝ պարեկների «ճռռիկները» տեղի են ունեցել մի վայրում, որտեղ գտնվում է հանրային այգին, մանկապարտեզն ու նաև դպրոցը: Սա նշանակում է, որ ամեն պահի կարող էին փողոցում հայտնվել մանկահասակ երեխաներ ու քաղաքացիներ։ Էլ չխոսենք այն մասին, որ այն, ինչ կատարվել է, տեղի է ունեցել երեխաների աչքի առաջ:
Մեզ հասած տեսանյութն ամբողջական չենք ներկայացրել։ Չհրապարակված հատվածում երևում է նաև, որ այդ պահին մի քաղաքացի հատում է փողոցը․․․
Ամեն դեպքում, ներկայացված տեսանյութն էլ բավական է հասկանալու համար, թե ինչ խախտումներ են անում պարեկներն ու որքան են նրանք անկիրթ իրենց գործում։
Պարեկները «ճռռիկներով» հարվածում են ցուցանակին, շրջադարձ կատարում ու հետո էլ հարվածում սյունին: Ականատեսի փոխանցմամբ՝ մեքենան ջախջախվել է այնպես, որ բացվել են անվտանգության բարձիկները:
Ի վիճակի չլինելով շարունակել հետապնդումը՝ վերոհիշյալ պարեկներն օգնություն են կանչում, սակայն ժամանած պարեկներին ևս չի հաջողվում այլևս հայտնաբերել խախտում արած վարորոդին:
Ինչպես արդեն նկատեցինք, տարածքում մանկահասակ երեխաներ ու քաղաքացիներ են եղել, ու չնայած դրան, պարեկները ոչ միայն վթարային իրավիճակներ են ստեղծել, այլև վարորդին բղավել են, թե՝ «կանգնիր, կկրակեմ»: Տարածքում գտնվող երեխաներն այս աղմուկից ու «գոնկաներից» վախեցել են...
Ավելորդ է խոսել այդ պարեկների վարքագծի ու տգիտության մասին։ Այստեղ կարևոր է ընդգծել, որ աշխատանքի անցնելուց առաջ, ՀՀ ոստիկանության ակադեմիայում 3 մասնագետ ստուգում է նրանց գիտելիքները և, փաստորեն, թույլ է տալիս, որ այս «անկրթությունը» մտնի հասարակության մեջ ու դրսևորվի լկտի պահվածքով։
Հետաքրքիր է, թե այս պարագայում ովքեր են դառնում իրավիճակի պատասխանատուները՝ ոստիկանությո՞ւնը, ովքեր թույլ են տալիս անգրագետ պարեկները խաղան նաև իրենց վարկանիշի հետ, կառավարությո՞ւնը, որը աչք է փակում պարեկների աշխատանքի վրա՝ ինչ-ինչ նկատառումներից ելնելով, թե՞ հենց ոստիկանության ղեկավար Վահե Ղազարյանը, ով ձեռքը սեղանին խփելու և անօրինությունն իրավապահների միջից հանելու փոխարեն փաստացի նպաստում է դրա տարածմանն ու անպատիժ թողնում օրինախախտներին։
Ինչևէ, ամեն դեպքում NEWSPRESS.am-ը հրավիրում է պատկան մարմինների ուշադրությունը խնդրին և ակնկալում, որ շատ կարճ ժամանակամիջոցում կպարզեն, թե ովքեր տեսանյութում հայտնված պարեկներն ու կստանան իրենց պատիժը: