Մեզ այլևս արտակարգ դրություն և պարետային ժամ պետք չէ. Գեորգի Գախարիա
Վրաստանում մայիսի 22-ից չեղարկվելու է արտակարգ դրության ռեժիմը: Այս մասին, Новости-Грузия-ի փոխանցմամբ, հայտարարել է Վրաստանի վարչապետ Գեորգի Գախարիան։
Միևնույն ժամանակ, նա նշել է, որ երկրում կերկարաձգվեն որոշ սահմանափակումներ, որոնք ուղղված են կորոնավիրուսի տարածման կանխմանը: Վարչապետը քաղաքացիներին կոչ է արել նաև արտակարգ դրության չեղարկումից հետո պահպանել այդ միջոցառումներն ու հետևել մասնագետների խորհուրդներին:
«Մենք պետք է հասկանանք, որ մեր հաջողության գինը կհավասարվի զրոյի, եթե բոլոր սահմանափակումների չմտածված չեղարկմամբ վտանգի ենթարկենք երկիրը, յուրաքանչյուր քաղաքացու և երկրի տնտեսական վերածնունդը: Այդ իսկ պատճառով մեզ պետք են այդ սահմանափակումները, սակայն արտակարգ դրություն և պարետային ժամ պետք չէ»,- ասել է Գախարիան: