Հրահանգը տրված է.Ucom-ը պետք է դառնա իշխանության «թոթոլ թիքեն»
Հայաստանում ծավալված պետական ռեկետը շարունակվում է անգամ արտակարգ դրության իրավական ռեժիմի պայմաններում:
Դրված է հստակ պահանջ՝ ամեն գնով տեր դառնալ Ucom ընկերությանը, որովհետև այն կապվում է նախկինների՝ ՊԵԿ նախկին նախագահ Գագիկ Խաչատրյանի ու նրա ընտանիքի անդամների հետ:
Իրավապահ համակարգը ամբողջ ներուժը դրել է բոլոր հնարավոր միջոցներով դրված պահանջը կատարելու համար՝ փոխանակ պայքարի երկրում հանցագործության աճի դեմ ու թույլ չտա ոստիկանների ներկայությամբ հիվանդանոցում մարդ դանակահարել:
Ու տրված հրահանգն իրականացնելու համար Ազգային անվտանգության ծառայության աշխատակիցները հասան արդեն Ucom ընկերության նորանշանակ տնօրեն Արա Խաչատրյանին:
ԱԱԾ-ականները խուզարկություններ իրականացրին նրա բնակարանում, չնայած նրան, որ Արա Խաչատրյանը դատավարական կարգավիճակ չունի, չի անցնում քրեական գործով:
ԱԱԾ-ականները խուզարկեցին նաև Ucom ընկերության նախկին տնօրեն Հայկ Եսայանի աշխատասենյակը, չնայած նրան, որ դատարանը թույլատրել էր խուզարկություն կատարել Արա Խաչատրյանի աշխատասենյակում. չգիտենք՝ ԱԱԾ-ականները միտումնավո՞ր էին աշխատասենյակների տեղը շփոթել, թե՞ հստակ նպատակով:
Խուզարկություններին զուգահեռ Ազգային անվտանգության ծառայություն հրավիրվեցին «Գալաքսի» ընկերության տասնյակ աշխատակիցներ և Գագիկ Խաչատրյանի կինն ու հարսը:
Ու ի՞նչ է սա, եթե ոչ ռեկետ պետական մակարակով: Հավանաբար, վարչապետ Նիկոլ Փաշինյանի խոսնակը մի բան գիտեր, երբ մի քանի օր առաջ Ֆեյսբուքում գրեց, որ առգրավվումներ են լինելու ու խուզարկություններ:
Մի կողմ թողնենք հարցը, թե քրեական գործին առնչվող գործողություններն ինչպե՞ս կարող են հասու դառնալ վարչապետի խոսնակին, գուցե իրավապահ մարմինները քննչական գործողություններ իրականացնելուց առաջ դրանց մասին նախապես զեկուցո՞ւմ են խոսնակին։
Խնդիրն այստեղ ավելի լուրջ է. սրանք գործողություններ են, որոնք կատարվում են «Ապօրինի ծագում ունեցող գույքի բռնագանձնման մասին» օրենքի համատեքստում:
Սա խոշոր կապիտալին տեր դառնալու ու երկրում կուլակաթափության գործընթաց սկսելու մեկնարկ է, որին առաջինը բախվեց Ucom ընկերությունը:
Վտանգավորն այստեղ այս գործողությունների այն հետևանքներն են, որոնք բելելու են համատարած քաոսի, որովհետև չի բացառվում, որ պետական ռեկետի ավարտից հետո գործազրկության շեմին կանգնեն այս ընկերության 3000 աշխատակիցներ և ինչպես կառավարություն կազմելիս, իշխանությունը որոշի, որ պետք է աշխատեն միայն քայլարածները:
3000 աշխատակից էլ ունի «Մուլտի Գրուպ»-ը, որի սեփականատիրոջ նկատմամբ ևս հարուցված է քրեական գործ ու նա կալանավորված է:
Արտակարգ դրության պայմաններում, երբ պետությունները պետք է ատամներով պաշտպանեն տնտեսվարողնրին ու նրանց ստեղծած աշխատատեղերը, Հայաստանում կատարվում է ճիշտ հակառակը՝ պետությունը գնում է ոչնչացման ճանապարհով:
Հանրապետության նախագահ Արմեն Սարգսյանը դեռ չի ստորագրել «Ապօրինի ծագում ունեցող գույքի բռնագանձման մասին» օրենքը, բայց արդեն կուլակաթափության մեկնարկը երկրում տրված է, հետևաբար կանխատեսելով դրա կործանարար հետևանքները պետության համար, Արմեն Սարգսյանը ևս Նիկոլի պետք է ասի «Կանգ ա՛ռ»՝ հակառակ դեպքում համատարած գործազրկության ու քաղաքացիական բախումերի մեջ նախագահն ինքն իր մեղավորության չափաբաժինը պետք է փնտրի: