Ինչու է իշխանությանը Միքայել Մինասյանը պետք հենց հիմա
Պետական եկամուտների կոմիտեի քննչական վարչությունում իրականացվող քրեական գործի նախաքննության ընթացքում ձեռք բերված բավարար տվյալների հիման վրա քրեական գործեր են հարոցվել Սուրբ Աթոռում ՀՀ նախկին դեսպան Միքայել Արայի Մինասյանի կողմից առերևույթ կատարված հանրորեն վտանգավոր արարքների դեպքերի առթիվ, նրա նկատմամբ կալանավորումը որպես խափանման միջոց կիրառելու մասին միջնորդություն է ներկայացվել դատարան:
Այս հաղորդագրությունը քիչ առաջ տարածեց ՊԵԿ լրատվական բաժինը և այլևս հայտնի է, որ Սերժ Սարգսյանի փեսայի նկատմամբ հայտարարվել է հետախուզում: Թողնենք այս քրեական գործն ու այն, որ իշխանության համար գերնպատակ է ամեն գնով ճաղերից այն կողմ տեսնել նույն ընտանիքից երկու անդամին՝ հորը և որդուն, հիշեցնենք, որ Միքայել Մինասյանի հոր՝ Արա Մինասյանի նկատմամբ ևս հարուցվեց քրեական գործ, նա ներգրավվեց որպես մեղադրյալ, բայց դատարանում հաղթեց Առողջապահության նախարար Արսեն Թորոսյանին:
Իրավապահներինը թողնենք իրավապահներին, դառնանք այս հարցի քաղաքական կողմին: Վերջին շաբաթվա մեջ մի քանի անգամ Նիկոլ Փաշինյանը ֆեյսբուքյան ուղիղ եթերում դարձյալ հիշեց նախկին թալանչիներին ու հայտարարեց, որ բոլորին հատ-հատ բռնելու է:
Փաշինյանին նույնությամբ կրկնեց նրա հոգեզավակ Ալեն Սիմոնյանն՝ Ազգային ժողովում աջ ու ձախ լրագրողներին հարցազրույցներ տալով, մոռանալով այն պարտականությունների մասին, որի համար գործուղվել է Ազգային ժողով:
Ակնհայտ է, որ կորոնավիրուսի համավարակը ճգնաժամային իրավիճակ է ստեղծել ոչ միայն մեր տնտեսության մեջ, այլև կառավարության ներսում: Կառավարության յուրաքանչյուր անդամ հասկանում է օր օրի անդունդը գլորվող իր վարկանիշի բացասական հետևանքները: Դա շատ լավ հասկանում է նաև Նիկոլ Փաշինյանը, ում համար վարկանիշը բարձր պահելու միակ միջոցը մնացել է Սերժով, Միշիկով, Գագիկ Խաչատրյանով, թալանչիներով պողոսներին սպառնալն ու վախեցնելը, և իր իշխանության երկարաձգումը:
Պողոսներն էլ չեն ոգևորվում նախկին թալանչիներին առաջադրված մեղադրանքներից, որոնց արդյունքում նրանք միևնույնն է ճաղերից այն կողմ չեն հայտնվում, ուստի պետք է ապահովել նոր տեսարաններ, նոր շոուներ՝ ժողովրդի ուշադրություը իրական խնդիրներից շեղելու համար, իսկ այդ ժամանակ, գործին են քցվում քրեական գործերով լրատվամիջոցները հեղեղելը:
Եթե հիմա ամբողջ իշխանությունը խոսի Միքայել Մինասյանի նկատմամբ հետախոուզում հայտարարելու մասին, ապա ժողովուրդը կմոռանա այն մասին, որ Լավրովն ասել է, որ քննարկվում է Արցախի հարցի լուծման փուլային տարբերակը, իսկ դա նշանակում է Ադրբեջանին 5 շրջանի հանձնում: Եթե լրատվամիջոցները ամբողջ օրը սկսեն գրել Միքայել Մինասյանի փաստաբանների մեկնաբանություններ ու քայլարածների ոգևորությունների մասին, էլ ժամանակ չի մնա գրելու տնտեսական ճգնաժամի, սոցիալական այն աղետալի հետևանքների մասին, որում ենք բոլորս, ուստի իշխանությանը ճիշտ մարտավարություն է ընտրել ու Մինասյանին էլ հետախուզում է հայտարարել շատ ճիշտ ժամանակին:
NewsPress.am