Ո՞վ կկարմրի այս ապտակից
Ամբողջ աշխարհում նավթի գինը սրընթաց անկում է ապրում, դարձել է ջրի գին, իսկ Հայաստանը կարող էր օգտվել առիթից ու բանակցություններ սկսել ռուսական կողմի հետ գազի գինը նվազեցնելու համար:
Տևական ժամանակ է փոխվարչապետ Մհեր Գրիգորյանն է զբաղված ռուսական կողմի հետ նամակագրություններով: Անընդհատ ինքներս մեզ հույս ենք տալիս, որ նավթի գնի նվազումը ստեղծել է շանս գազի գինը նվազեցնելու համար ու պահանջում ենք մեր կառավարությունից դուխ հավաքել ու բանակցություններ սկսել այդ հարցով Պուտինի հետ:
Ի հեճուկս հանրության պնդումների, որ գազի գինը քաղաքական հարց է, և պետք է բանակցություններ վարել հենց Վլադիմիր Պուտինի հետ, մեր երկրի ղեկավարը որոշեց Բելառուսի նախագահի հետ ընդդեմ Պուտինի ժեստ անել ու դրա պատասխանն այսօր ստացանք Ռուսաստանի արտգործնախարար Սերգեյ Լավրովից:
Պաշտոնյան ասաց, որ նույնիսկ էներգակիրների գների ներկայիս անկման պարագայում պայմանագրերով նախատեսված պարտավորությունները շարունակում են նույնը մնալ: Լավրովը նաև հիշեցրել է, որ եղել են նաև ժամանակներ, որ գազի գինը Հայաստանի և Բելառուսի համար 2-3 անգամ ավելի ցածր էր շուկայականից: ՌԴ պաշտոնյան դեմ չէ, որ դաշնակիցները ստանան տնտեսական առավելություններ, բայց ընդգծել է, որ գազի ներկայիս գնի համար կողմերը կրում են պայմանագրային պարտավորություններ:
Լավրովը մեզ հիշեցրել է, թե մեր երկրում ինչ է կատարվում ռուսական ընկերություններից հետ, երեսով է տվել «Հարավկովկասյան երկաթուղիներ»-ի հետ կապված քրեական գործը ու խոսել դաշնակիցներին ոչ սազական քայլերի մասին:
Սա ռուսական կողմի ապտակն է հայաստանյան իշխանություններին, որով ևս մեկ անգամ հայտարարում են, որ այն ինչ ցանել եք այս երկու տարվա ընթացքում՝ կքաղեք գազի բարձր գնի տեքսով: Սա զարմանալի չէ, չէ՞ որ այսօր իշխանության են եկել ժամանակին ամենաակտիվ հակառուսական տրամադրություններ տարածողները, իսկ վարչապետ Նիկոլ Փաշինյանն էլ, հասարակությանը մի քանի խմբի մոդելավորելու ժամանակ, հստակ առանձնացրել է նաև իրենից հիասթափված ռուսամետներին: Հիմա հարց է առաջացել, ի՞նչ է անելու փակուղու առաջ կանգնած վարչապետը, որպեսզի ռուսական կողմը գազի գինը 32 տոկոսով չթանկացնի, և արդյոք կորոնավիրուսի տնտեսական հետևանքների տակ կքած մեր տնտեսությունը կարո՞ղ է այդ բեռը կրել:
Այս իրավիճակը, որում մենք հայտնվել ենք, թույլ է տալիս եզրակացնել, որ ռուսական ապտակն ու գազի գնի բարձրացումը կարող է բերել սոցիալական նոր ընդվզման և Աստված չանի, որ դա լինի համավարակի ժամին:
NewsPress.am