Էս խելացի դեմքով տհասը նաև Երևանի ավագանու անդամ է. Դավիթ Խաչատրյանի գրառմանն արձագանքել է ՀՌԱՀ անդամը (ֆոտո)
Հեռուստատեսության և ռադիոյի ազգային հանձնաժողովի անդամ Տիգրան Հակոբյանը ֆեյսբուքյան իր էջում անդրադարձել է Երևանի ավագանու «Իմ քայլը» խմբակցության անդամ Դավիթ Խաչատրյանի ֆեյսբուքյան գրառմանը, որը նա ավելի ուշ թարմացրել է։
«Էս խելացի դեմքով տհասը նաեւ Երեւանի ավագանու անդամ է: ԱՆԴԱՄ!!! Ափսոս, դաստիարակությունս թույլ չի տալիս սրա տեսակը համացանցում հայհոյել...»,- գրել է Հակոբյանը։
Նշենք, որ ավագանու անդամն իր էջում հրապարակել էր Թբիլիսիի ախտահանման լուսանկարները՝ կից գրելով. «Թբիլիսին լվանում է փողոցները վիրուսից, դրան հետևելու է մետրոյի և երկաթգծի ռելսերի ախտահանումը, այնուհետև Թբիլիսի-Բաթումի մայրուղին, Փոթիի նավահանգստի ափամերձ ջրերը և ՌԴ-ՀՀ գազատարի խողովակները, իսկ վերջում կառուցվելու է հզոր ժամանակակից քամու գործարան, որ փչի ու վրացական հողերից քշի տանի էդ չարիքը»,-գրել էր։
Ավելի ուշ Խաչատրյանը թարմացրել է գրառումն ու ավելացրել, որ հումոր էր անում.
«ԹԱՐՄԱՑՎԱԾ!
Քանի որ ստորև գրառումը որոշ մարդկանց կողմից այլ մեկնաբանություններ անելու առիթ հանդիսացավ, ուզում եմ նշել հետևյալը. այս դժվար ու լարված օրերին սա լիցքաթափվելու համար արված հումորային գրառում էր` միայն և բացառված է որևէ հեգնանք մեր գործընկեր վրացիներին ուղղված, ամեն երկիր պայքարելու ինչ-որ ձև է փնտրում, և սա էլ դրանցից մեկն է, հուսամ այն թեկուզ մի փոքր օգուտ կտա:
Առողջ եղեք»,- գրառմանն հավելել է նա։