Բարդույթավորված մարդն իշխանության ղեկին հակացուցված է. մեզ պետք է հոգեպես առողջ ու կայուն առաջնորդ. հոգեբան
Ասել, որ երկրի ղեկավարը կամ պաշտոնյան պետք է բարդույթով առաջնորդվի, մեծագույն սխալ ու մոլություն է։ «Փաստինֆո»-ի հետ զրույցում նման կարծիք է հայտնել հոգեբանական գիտությունների թեկնածու Կարինե Նալչաջյանը՝ անդրադառնալով ՀՀ վարչապետ Նիկոլ Փաշինյանի՝ այսօր ՀՔԾ-ում արած հայտարարությանը։
Մասնագետը նախ բացատրեց՝ հոգեբանական բարդույթ հասկացությունը, առհասարակ, հոգեախտաբանության տիրույթից է։ «Երբ խոսում ենք մարդկանց բարդույթներից, դրանք առանձնապես մարդու հոգեկան առողջության մասին չեն խոսում, այսինքն, եթե մենք խոսում ենք բարդույթի մասին, թեկուզ դրական ֆոնի վրա, մենք ընդհանրապես սխալվում ենք։ Հոգեբանության մեջ վաղուց է հայտնի, որ կյանքում բարդույթներով առաջնորդվելը հաճախ կործանարար է լինում ոչ միայն այն մարդկանց համար, ում հետ շփվում են, համագործակցում են, ազդեցությունը կրում են իրենց վրա, այլեւ հենց իրենց»։
Հոգեբանի խոսքով, բարդույթներ ունենալ, նշանակում է՝ իրականության զգացողությունը կորցնել, իրական կապերը փոխարինել կեղծ, անհասկանալի, սուբյեկտիվ , անառողջ կապերով։
Հիշեցնենք, վարչապետ Փաշինյանն հայտարարել է.
«Հայաստանում պաշտոնյաները շատ արագ ձեռք են բերում իշխանի, բդեշխի բարդույթ եւ մեր խնդիրն է, որ պետական պաշտոնյաների էս իշխանի, բդեշխի բարդույթը փոխակերպվի Հիսուսի բարդույթով»։ Նա ասել է, որ այդ դեպքում պաշտոնյան կհասկանա, որ և՛ տեր է, և՛ ծառա։
Կարինե Նալչաջյանի խոսքով, նախ եւ առաջ պաշտոնյան պետք է կարողանա հասկանալ իր ստանձնած դերի լրջությունը, այն մեծագույն պատասխանատվությունը, որը դնում է իր առջեւ այդ դերը եւ սպասելիքները, որոնք ունեն մարդիկ։ «Այս դեպքում հոգեբանական կայունություն է անհրաժեշտ, շատ բարձր ինտելեկտ, այսինքն, ասել, որ իշխանավորը պետք է ունենա այս կամ այն բարդույթը, դա նշանակում է ասել՝ եկեք անառողջ մարդկանց ձեռքը տանք կարեւոր օղակների ղեկը»։
Հոգեբանը նկատեց՝ «նախարար» բառը լատինական «մինսիտր» բառն է, որի նախնական իմաստը հենց ծառան է։ «Նախարարները պետք է հասկանան, որ այն դիրքը, որն իրենք գրավել են, նախ եւ առաջ ծառայություն է նշանակում, նա այդտեղ է ոչ թե վայելքների, իշխանությամբ պարծենալու, կյանքից կտրվելու եւ ինչ-որ կոմպլեքսների գիրկը ընկնելու համար, այլ ժողովրդին ծառայելու համար, իսկ նախարարից նախարարը, այսինքն, վարչապետը ժողովրդի համար մեկ ծառան է»,-ասաց մեր զրուցակիցը՝ շեշտելով, որ հասարակությունը վարչապետից ոչ թե հրաշագործ քայլեր է ակնկալում, այլ լուրջ աշխատանք։
«Այսօրվա պնդումով Փաշինյանը եւս մեկ անգամ շեշտել է, որ ինքն իրեն Քրիստոս է զգում, սա հոգեբանական ինքնանույնացում է Քրիստոսի կերպարի հետ կամ, բդեշխ ասելով, գուցե նկատի է ունեցել իշխանության մոլուցքով տարված մեկի՞ն։ Բդեշխը պատմականորեն այսօրվա մարզպետի կարգավիճակի նման մի բան է եւ մարզպետ լինի, նախարար, թե վարչապետ, նրանք, նախ և առաջ, հայրենիքի եւ պետության ծառան են եւ չպետք է փորձեն թաքնվել կոմպլեքսների քողի տակ։ Մտահուզական բարդույթ է կոմպլեքսը, կոմպլեքսավորված մարդն ընդհանրապես իշխանության ղեկին հակացուցված է, որովհետեւ գոյություն ունեցող կամ հնարավոր բարդույթներ ունեցող մարդկանց գործելակերպը ինչ-որ մի պահի չարիք է դառնալու, այնպես որ, մենք բարդույթավորված իշխանավորների կարիք ընդհանրապես չունենք։ Մենք ունենք լրջմիտ, բարձր ինտելեկտ ունեցող, բարեկրթություն եւ կրթվածություն ունեցող, հոգեպես առողջ ու կայուն, եւ որ շատ կարեւոր է, հայրենիքի համար մեծագույն պատասխանատվության զգացում ունեցող առաջնորդների կարիք»։
Կարինե Նալչաջյանն առաջարկում է մոռանալ բարդույթների մասին, որովհետեւ լավ ու վատ բարդույթներ չկան։
Ինչ վերաբերում է վարչապետ Փաշինյանի՝ արդեն երկրորդ անգամ Քրիստոսի հետ համեմատությանը, հոգեբանը նկատեց՝ հեղափոխական թոհուբոհի մեջ բարդույթավորված մարդիկ նրան Քրիստոսի, փրկչի ու մարգարեի հետ համեմատեցին, ինչը լուրջ ընդունվեց։
Նյութն ամբողջությամբ` սկզբնաղբյուր կայքում