«Տեսանք, որ կա ուրիշ թիվ՝ 29․743քառ․կմ, իսկ 29․800-ը՝ կլորացրած թիվ է»․ Փաշինյան
Էնպես չի, որ բանակցային սենյակում մթնոլորտը պոզիտիվ է։ Այդ մասին այսօր իր ասուլիսի ընթացքում ասաց Նիկոլ Փաշինյանը՝ անդրադառնալով Ալիևի հետ վերջին հանդիպման ընթացքում գրանցած արդյունքներին։
Բայց և այնպես, նա անցյալ շրջանից մի դրվագի մասին պատմեց ՀՀ՝ 29.8 հազար քկմ տարածքը ճանաչելու հետ կապված։
«Ադրբեջանը հայտարարում էր, որ ճանաչում է Հայաստանի տարածքային ամբողջականությունը։ Բայց բրյուսելյան մի հանդիպման ժամանակ հարց ծագեց՝ ի՞նչ նկատի ունի Ադրբեջանը՝ Հայաստանի տարածքային ամբողջականություն ասելով։ Եվ այս խոսակցության ընթացքում հասանք այն կետին, որ երևի կան օբյեկտիվ տվյալներ, ու պետք է հղում անել այդ տվյալներին՝ մասնավորապես տարածքի տվյալի վրա: Ու հիմա կա այդ իրադրությունը, գաղափարն էլ դիտարկելի էր և քննարկելի։ Մենք ասացինք՝ «շատ լավ, բայց ի՞նչ թիվ»։ Պատկերացնում եք չէ՞ իրադրության լարումը, որ կողմերը պետք է ասեն՝ մեր տարածքն այսքան է»,- ասաց Փաշինյանը։
Նա նշեց, որ այդ ժամանակ որոշվել է դուրս գալ սենյակից ու հետո հայտարարել թիվ՝ տարածքի մասին։
«Եվ որոշեցինք հայտարարել այն թիվը, որ ֆիքսված է խորհրդային հանրագիտարանների վերջին հրատարակումների մեջ։ Ու հանդիպումից անմիջապես հետո ես զանգել ու ասել եմ, որ խորհրդային վերջին հանրագիտարանի տիտղոսաթերթը նկարեն, ուղարկեն ինձ։ Չնայած ես հիշում էի՝ 29,800 քառաակուսի մետր»,- ասաց նա։
Փաշինյանը նկատեց նաև, որ ավելի ուշ բացել են հանրագիտարանը և տեսել, որ այնտեղ ուրիշ թվեր էլ կան ու 29,800-ը, նրա խոսքով, կլորացրած թիվ է։
«Տեսանք, որ կա ուրիշ թիվ՝ 29,743քառ․ կմ»,- ասաց նա։
Իսկ երբ Փաշինյանը ֆիքսել է այդ թիվը՝ նրա ադրբեջանցի գործընկերները նրա ուշադրությունը հրավիրել են Հայաստանի պետական մարմիների կայքերի վրա, որտեղ 10-յակ տարիներ եղել է այդ թիվը՝ 29․743 քառ․մետր։
«Այսինքն՝ 29․800 կլորացրած թիվ է»,- ասաց նա՝ նշելով, որ սա էր պատճառը, որ լարումներ են առաջացել՝ կապված տարածքային ամբողջականության ճանաչման հետ։
Փաշինյանը նկատեց՝ ինքը երբ խոսում էր այս մասին, հանրությունը զգում էր, որ այդ խոսակցության մեջ ինչ-որ բան այն չէ, բայց չէր հասկանում՝ ի՞նչը կոնկրետ այն չէ։