«Արցախը մունք ենք» բարեգործական համերգի դեմ կրքերը թեժացել են․ հիշատակի երեկոն կկայանա ամեն դեպքում՝ արտիստները մարտական են տրամադրված

Դեկտեմբերի 7-ին՝ ժամը 19։00-ին, Արամ  Խաչատրյանի անվան համերգասրահում տեղի կունենա «Արցախը մունք ենք» բարեգործական համերգ-հիշատակի երեկո։

Սիրված կատարումներով հանդես կգան ՀՀ վաստակավոր արտիստներ Նունե Եսայանը, Շուշան Պետրոսյանը, Սոնան, Գայա Արզումանյանը, Արսեն Սաֆարյանը, Ալլա Լևոնյանը, Ռուբեն Սասունցին, Արսեն Գրիգորյանը, Լիանան և «Այաս» պարային համույթը։

Հարկ է նկատել, որ համերգի հասույթն ամբողջությամբ ուղղվելու է Արցախից բռնի տեղահանված ընտանիքներին՝ սոցիալական առաջին կարիքների ապահովմանը։

Համերգի անցկացման օրվա ընտրությունը որոշ օգտատերերի շրջանում վրդովմունք է առաջացրել։ Վերջիններս քննադատել են ու իրենց մեկնաբանություններում նշել, թե այդ օրը սգո օր է (1988-ի երկրաշարժ) և «իրավունք չունեն» այդ օրը համերգ կազմակերպել։

«Դա հիշատակի օր է և արվում է բարեգործական հիմունքներով»,- NEWSPRESS.am-ի հետ զրույցում, հարցին անդրադառնալով, ասաց համերգի կազմակերպիչ, «Հայաստան-Արցախ-Սփյուռք» հասարակական կազմակերպության (ՀԿ) հիմնադիր ու համանուն ամսագրի խմբագիր Լուսինե Նազարյանը։ 

Նա նշեց, որ օրվա ընտրության հարցում այլընտրանք չի եղել՝ մինչև Նոր տարի դահլիճը զբաղված է եղել։

«Մենք ուզում էինք նախատոնական օրերին անցկացնել համերգը։ Դահլիճը մեզ տրամադրելու համար առաջարկվել է 2 օր՝ դեկտեմբերի 7-ը և 10-ը։ Մնացած օրերը զբաղված են եղել։ Իսկ քանի որ բարեգործական համերգին մասնակցող երգիչներից մի քանիսը դեկտեմբերի 10-ին այլ ծրագրով պետք է դուրս գան երկրից, ուստի մնաց միայն դեկտեմբերի 7-ը՝ հաշվի առնելով նաև, որ պաշտոնապես դեկտեմբերի 7-ը սգո օր չի համարվում»,- պարզաբանեց մեր զրուցակիցը։

Բացի այդ, նա նկատեց, որ այդ օրն անգամ Գյումրիում է համերգ լինելու։ Դա այն դեպքում, երբ Գյումրին 1988-ի երկրաշարժից ամենաշատ տուժած քաղաքներից մեկն է։ Լուսինե Նազարյանն ընդգծեց նաև, որ այդ օրը գործում են ժամանցային բոլոր կենտրոնները և այդ օրը նշանակված ոչ մի միջոցառում չի չեղարկվել։

«Արցախը մունք ենք» բարեգործական համերգ-հիշատակի երեկոյին ուղղված քննադատությունները, ըստ մեր զրուցակցի, այլ  ուղղվածություն ունեն։ Նրա խոսքով` անգամ, եթե դեկտեմբերի 7-ի փոխարեն մեկ այլ օր ընտրվեր՝ նման քննադատությունների տեղատարափի տակ էին հայտնվելու՝ հաշվի առնելով նաև բարեգործական համերգին մասնակից երգիչների քաղաքական հայացքները:

Այլ կերպ ասած՝ այս հարցում, ինչպես ասում են, քամիներն այլ կողմից են փչում։

«Շատ կեղծ էջերով, ֆեյքերով հայատյաց արտահայտություններ են անում ու մեկնաբանություններ թողնում՝ կապված «մունք»-ի հետ։ Ասում են՝ ինչո՞ւ եք մեր գեղեցիկ մայրենի լեզուն աղավաղում ու թրքաբարո արտահայտություններ ներմուծում մեր առօրյա կենցաղ։ Նրանք քննադատում են, թե ինչո՞ւ մենք պետք է Գյումրու երկրաշարժի զոհերի հիշատակի օրը հիշատակենք արցախցիներին՝ մոռանալով, որ Արցախի պատերազմում մի ամբողջ սերունդ ենք կորցրել»,- ասաց  Լուսինե Նազարյանը։

Նա նաև կարևոր համարեց հայտնել, որ երգչուհի Սոնա Շահգելդյանի ֆեյսբուքյան էջից ստացել է կասկածելի նամակներ, որոնց հեղինակը հայտնել է, թե իբր կոտրել են իր էջն ու այն վերականգնելու համար իրեն հարկավոր են Լուսինե Նազարյանին անձնական էջի տվյալները։

«Մտածեցի, որ կարող եմ օգնել իրեն, բայց հետո պարզվեց, որ Սոնա Շահգելդյանի էջը կոտրել են, և գրողը ինքը չի եղել։ Փաստորեն, 2 օր անընդմեջ փորձել են ինձ հիմարեցնելով ու ինձնից տվյալներ կորզելով՝ մտնել իմ ֆեյսբուքյան անձնական էջ»,- ասաց Լուսինե Նազարյանը։

Նա նշեց, որ խնդրի մասին տեղյակ է պահել ուժային կառույցներին։ Վերջիններս կասկածներ են հայտնել, որ ակտիվությունը նկատվում է ադրբեջանական կողմից՝ կապված համերգի հետ ակտիվության ու նաև այն հանգամանքի հետ, որ Լուսինե Նազարյանը հանդիսանում է «Հայաստան-Արցախ-Սփյուռք»  ամսագրի խմբագիրը։ Չի բացառվում նաև, որ բացասական մեկնաբանությունները ևս այդ կողմից լինի։

Լուսինե Նազարյանը նաև նշեց, որ չնայած քննադատություններին, տհաճ մեկնաբանություններին ու բացասական վերաբերմունքին՝ կայանալիք բարեգործական համերգին մասնակից արտիստները մարտական են տրամադրված և մտադիր չեն ետ կանգնել իրենց որոշումից։  Համերգ-հիշատակի երեկոն կկայանա՝ ամեն դեպքում։

Արմինե Մկրտումյան