Քաղաքական դիրքավորում՝ շնորհավորանքի միջոցով
Հայաստանի երկրորդ նախագահ Ռոբերտ Քոչարյանի ծննդյան 65-ամյակի առիթով արված շնորհավորանքները բավական երկար մտորելու և վերլուծելու առիթ են տալիս։ Ինչպես և սպասելի էր, հնչեց թերևս ամենից կարևոր շնորհավորանքը՝ Ռուսաստանի նախագահ Վլադիմիր Պուտինի կողմից։
Որևէ մեկի համար այլևս կասկածահարույց լինել չի կարող, որ այդ շնորհավորանքը զուտ մարդկային ժեստ լինելուց հետո, որպիսին անում են ընկերները, նաև քաղաքական յուրահատուկ ուղերձ էր։
Մոսկվան հստակ ուղերձներ հղեց շնորհավորանքի տեքստի ամեն մի տողում։ Ինչպես և անցյալ տարի, Պուտինը Քոչարյանին մաղթել էր տոկունություն, ոգու ամրություն, ինչը նշանակում է, որ Մոսկվայի համար Քոչարյանի թեման փակված չէ և չի կարող փակված լինել, ու պայքարը դեռ առջևում է։ Ուշագրավ էր հայկական էլիտայի վերաբերմունքը։ Հայաստանի երրորդ նախագահ Սերժ Սարգսյան, Արցախի գործող ու նախկին նախագահները, Հայաստանի ու Արցախի ռազմական վերնախավի առանձին ներկայացուցիչները իրենց շնորհավորանքներով մոտավորապես գծեցին բավական հետաքրքիր պատկեր, ցույց տալով հասարակության այն հատվածը, որը կանգնած է Քոչարյանի կողքին։
Պուտինը Քոչարյանին հղված շնորհավորանքում գրել էր, որ նրան ճանաչում է որպես Ռուսաստանի իրական բարեկամի, մի բան, որ երբեք չի գրել Փաշինյանին ուղղված գրություններում։ Ասել է, թե՝ բոլոր նրանք, ովքեր շնորհավորել են նախագահ Քոչարյանին, նույնպես հանդիսանում են Ռուսաստանի իրական բարեկամներ։
Արդեն իսկ որոշ փորձագետներ զգուշավոր մտքեր են արտահայտում, որ Պուտինի՝ Երևան կատարելիք առաջիկա այցում Հայաստանի երկրորդ նախագահի ֆակտորը բավական ներկայանալի է լինելու։ Չի բացառվում, որ Պուտինը հանդիպի Քոչարյանի հետ՝ նրան բանտում այցելելով։ Չի բացառվում նաև, որ Պուտինն ընդհանրապես չգա Հայաստան, կամ էլ սահմանափակվի Գյումրիի իր ռազմակայան այցելությամբ։ Այդ դեպքում ԵԱՏՄ սպասվող գագաթնաժողովը կարող է լինել 102-րդ բազայում։
Ամեն դեպքում այս տարվա շնորհավորանքների ալիքը ցույց տվեց, որ անցյալ տարվա վախվորածությունն արդեն հաղթահարվել է, ու բոլորը սկսել են բացեիբաց դիրքավորվել առաջիկա դրամատիկ քաղաքական զարգացումներին ընդառաջ, ինչը հատկապես հայաստանյան քաղաքական դաշտին է վերաբերում։