Կոտայքի մարզպետն սպառնում է դատարան տալ իր եղբոր մասին «կեղծ ու շինծու լուրը» տարածողին
Կոտայքի մարզպետ Ռոմանոս Պետրոսյանը արձագանքել է մամուլի հրապարակմանը, ըստ որի իր եղբայրը Աբովյանի ռեստորաններից մեկում ճաշել է եւ հրաժարվել է դրա դիմաց վճարել: Նա ֆեյսբուքյան իր էջում գրել է.
«Այս լուրը իմ, մերձավորներիս և Աբովյանում գործող քաղաքական թիմիս դեմ վերջին օրերին իրականացվող տեղեկատվական արշավի մաս է կազմում` նպատակ ունենալով սադրանքների, զրպարտանքի և ապատեղեկատվության միջոցով հանրության շրջանում արատավորել իմ և ինձ հետ փոխկապակցված անձանց անունները` ընդառաջ Աբովյանի քաղաքապետի ընտրությունների»,- գրել է մարզպետն ու հավելել, որ լուրը կեղծ է, շինծու և իրականության հետ որևէ աղերս չունի:
Նա պահանջել է հերքել լուրը և լրատվամիջոցին սպառնացել է հերքում չտարածելու պարագայում երկուշաբթի օրն անմիջապես ձեռնամուխ լինել դատարան դիմելու գործին: