Դեռևս մասսայական կրճատումներ չեն լինի. Ավինյանն ասաց, թե առաջինն ովքեր կկրճատվեն

«Մասսայական կրճատումներ այս փուլում դեռևս չեն սպասվում»: Այս մասին կառավարության նիստից հետո լրագրողների հետ զրույցում ասաց ՀՀ փոխվարչապետ Տիգրան Ավինյանը՝ անդրադառնալով կառավարության օպտիմալացմանը:

Նա նկատեց, որ առաջին գործով կկրճատվեն մի քանի նախարար ու նախարարի տեղակալներ։ 

«Օպտիմալացման առաջին փուլում գնահատվելու ու վերանայվելու են միայն նախարարների ու փոխնախարարների գործառույթները և աշխատանքի ծավալը` գերբեռնվածության ու թերբեռնվածության խնդիրները վեր հանելու նպատակով։ Ըստ այդ ուսումնասիրության արդյունքի էլ կատարվելու են կրճատումները»,-  ասաց Ավինյանը:

Ինչ վերաբերում է հետագա փուլերում աշխատանքից զրկվող քաղծառայողներին, փոխվարչապետը նշեց, որ նրանցից ոմանք կկարողանան մնալ պետական համակարգում` օգտվելով քաղծառայողի իրենց կարգավիճակից, մյուսների համար սա հնարավորություն կլինի տեղափոխվելու մասնավոր ոլորտ ու չլճանալու նույն աշխատանքում։

Անդրադառնալով ընդդիմադիրների նախագծերը մերժելու հարցին, Ավինյանը նկատեց, որ հիմնականում մերժվում է, քանի որ դրանք կառավարության ընդհանուր ռազմավարության, տրամաբանության մեջ չեն լինում:

«Իմ մոտ այնպիսի տպավորություն է ստեղծվում, որ գործընկերները նոր են բացահայտել այդ գործիքակազմի առկայությունը»,- ասաց Ավինյանը և հավելեց, որ այդ առաջարկները չեն մերժվում զուտ այն պատճառով, որ դրանք առաջ է քաշել ընդդիմությունը:

Փոխվարչապետը վստահեցրեց, որ յուրայինների նախագծերը ևս բացասական արձագանքների են արժանանում: