Վանաձորի դպրոցների տնօրենները պատասխանում են մարզպետին՝ «Քաղաքացու օրվա» միջոցառմանը չմասնակցելու համար
Վանաձորի դպրոցների մի շարք տնօրեններ իրենց մտահոգությունն են հայտնել կապված «Քաղաքացու օրվա» առիթով միջոցառումներին չմասնակցելու հետ: Լոռու մարզպետարանից և Վանաձորի քաղաքապետարանից նրանց հարցում է գնացել, թե ինչու չեն մասնակցել միջոցառմանը: վերջիններս բաց նամակ են ուղարկել «Լոռի» հեռուստաընկերության խմբագրություն, որը ներկայացնում ենք ամբողջությամբ:
«Հարգելի խմբագրություն, Վանաձորում, «Քաղաքացու օրվան» նվիրված մասսայական միջոցառումներին, դպրոցների տնօրենների հիմնական մասը չի մասնակցել: Մեզնից մի մասը կարծել էր, որ դա նաև մե՛ր օրն է և տնօրինել ենք այնպես, ինչպես հարմար ենք գտել: Սա նորմալ կդիտվեր, եթե Լոռու մարզպետարանի կրթության, սպորտի և մշակույթի վարչության աշխատակիցները չզանգեին և ճշտումներ չպահանջեին դպրոցների տնօրեններից, թե ինչու ներկա չեն գտնվել և չեն մասնակցել մասսայական տոնակատարությանը:
Ստացվում է, որ մեր մարզում ոչ մի իրավիճակ էլ չի փոխվել, նախկինում էլ նման միջոցառումներին իշխանությունները պարտադրանքով էին մասնակցություն ապահովում, հիմա էլ շարունակում են ճնշումներ գործադրել, բացատրություն պահանջել իրենց ենթակայության տակ գտնվող տնօրեններից, այս դեպքում՝ մեզնից: Մենք վիրավորված ենք նման վերաբերմունքից, ուզում ենք բարձրաձայնել իրավիճակը, մտավախություն հայտնելով, որ, եթե այս անգամ միջոցառումներից հետո են եղել ճնշող և ճշտումներ պահանջող զանգեր, հետագայում էլ այլ ճնշումներ կլինեն և արդեն նախապես, միջոցառումներից առաջ այլևայլ պարտադրանքներով:
Այսինքն, ինչ է ստացվու՞մ, ճնշումներից, պարտադրանքներից խուսափել հնարավոր չէ՞, ինչու է վերադասի կողմից տնօրենների ոչ միայն աշխատանքը վերահսկվում, այլև տոնական օրը:
Չէ որ քաղաքացու օրը արժանապատիվ քաղաքացիներ ունեցող երկրի տոնն է»:
Խմբագրությունն իր կողմից հավելել է. «Տնօրենները նախկին գործընկերոջ հոգեհանգստի ժամանակ են բացահայտել, որ երեւույթը համատարած բնույթ է կրել և որոշել են դիմել խմբագրություն: Նրանք վստահելով մեզ, խնդրեցին առայժմ իրենց անունները չհրապարակել, եւ հնարավոր է, որ հաշվեհարդարներ լինեն: Վստահ ենք, որ հերթական անգամ «ապատեղեկատվություն» որակելուց առաջ մարզային իշխանությունները կվերանայեն իրենց դիրքորոշումը եւ վերաբերմունքը տնօրենների հանդեպ»: