Մի քանի ուշագրավ ինքնախոստովանություն՝ Սասուն Միքայելյանից
ԵԿՄ նախագահ, «Իմ քայլը» խմբացության պատգամավոր Սասուն Միքայելյանն այսօր Ծիծեռնակաբերդի հուշահամալիրում մի քանի ուշագրավ ինքնախոստովանություն արեց:
Նա նախ նշեց, որ «կուրսի մեջ չէ», թե «Քաղաքացու օրվա» համար հատկացված 124 միլիոնն ինչպես է ծախսվելու և արդյոք նորմա՞լ է պետության կողմից այդքան գումարի տրամադրումը: Ինքը՝ պատգամավորը, այդ օրը պատրաստվում է Հրազդանում խորոված կամ կարտոֆիլ ուտել: Լրագրողներն արդարացիորեն հետաքրքրվում են՝ խորովածի համար մոտ 250-260 հազար դոլարը շատ չէ՞: Ինչ-որ լղոզված պատասխաններ է տալիս Միքայելյանը ու կրկին, դասական դարձած արտահայտությունն անում՝ էն ժամանակ բա ինչքա՜ն էր մսխվում...
Իհարկե, հասկանալի է, որ նեոիշխանականները, որոնք մաս կազմելով իշխանությանը, տեղյակ չեն, թե ինչու են իրենց վերադասները որոշել ահռելի գումար հատկացրել մի բանի համար, որից իրենք էլ «թամամ» տեղյակ չեն, պետք է հղում անեն նախորդների թալանին, մի տեսակ վախեցնելով ժողովրդին, թե հիշեք՝ նրանք ավելի վատն էին:
Սասուն Միքայելյանը, փաստորեն, խոստովանում է, որ ժողովուրդն ընտրություն է արել ոչ թե լավի ու վատի, այլ վատի ու վատագույնի միջև:
Լրագրողները հարցնում են՝ արդյոք առնետների հետ ու ամեն վայրկյան քանդվելու վտանգը գլխներին կախված քաղաքացինե՞րն էլ պետք է դուրս գան փողոց՝ Քաղաքացու օրը նշելու, Միքայելյանը հաստատական դրական պատասխան է տալիս ու հավելում, որ այս իշխանափոխությունը հենց նրանք են արել:
Թռուցիկ անդրադառնանք Միքայելյանի ընտրած բառին՝ իշխանափոխություն: Միքայելյանը մի բառով, որը, բնավորության համաձայն, արտաբերում է առանց երկար-բարակ մտածելու (նա քանիցս արժանացել է քննադատությունների իր՝ առաջ ընկած լեզվի պատճառով. ընտրությունների հաղթանակն արցախյան պատերազմի հաղթանակից վեր դասելու դեպքը, առաջնագծում զինվորների ոչ բավարար լինելու մասին հայտարարությունը ևն), փաստորեն, ընդգծում է մարդկանց համոզմունքը, որ տեղի ունեցածը լոկ իշխանափոխություն էր՝ անձերի, մարդկանց փոփոխություն:
Հեղափոխություն ապրած երկրում, քաղաքացին դեռ ոչ մի շոշափելի դրական փոփոխություն չտեսած, իր գրպանի վրա ու առօրյա կյանքում փոփոխություն չզգացած, չպետք է տեսներ կաշառքի վրա բռնվող փոխնախարար, մեղադրյալի կարգավիճակ ունեցող՝ վարչապետի կողմից նշանակված՝ կառույցի ղեկավար: Սասուն Միքայելյանը մեկ բառով ցրում է Փաշինյանի սիրելի «ոչ բռնի, թավշյա, ժողովրդական հեղափոխություն» գեղեցիկ, բայց մարդկանց ոչինչ չտված արտահայտությունը:
Ինչ վերաբերում է տնակում ապրողներին ու նրանց կողմից «Քաղաքացու օրը» նշելուն, ապա այստեղ ևս Միքայելյանը խոստովանում է, որ մարդիկ, հոգնած լինելով նախորդների կողմից անընդհատ թալանվելուց, կեղեքվելուց և վերջապես խարխուլ պատերի մեջ ու սոված ապրելուց, իրենց բերել են իշխանության: Ու յուրաքանչյուրը փողոց է դուրս եկել ոչ թե կոնկրետ անհատի իշխանություն տալու, այլ արժանապատիվ կյանք ունենալու՝ գոնե սեփական տան ամուր պատեր ունենալու, ոչ թե փողոցում տարին մեկ օր խորոված կամ կարտոֆիլ ուտելու համար:
Ու ծնողը, ում անչափահաս երեխայի գլխին ամեն գիշեր փլվելու վտանգն է կախված, չի կարող հանգիստ խղճով դուրս գալ Նիկոլ Փաշինյանի ու Սասուն Միքայելյանի պաշտոն ու «թոթոլ» աշխատավարձ ստանալը տոնել: Որքան էլ աղքատությունը գլխում հաղթահարած լինի:
Իսկ հիմա արդեն Միքայելյանը չինովնիկ է, որդուն նույնպես փափուկ աթոռի է տեղավորել, կարելի է վայելել իշխանության քաղցրությունը, ու թքած, թե իրեն աթոռի հասցրածները սոված չեն քնում, կարևորը մի շամփուր խորովածն է ու կարտոֆիլը...