Արմեն Սարգսյանը, Օպերայի տնօրենի պաշտոնի համար, Նազելի Ղարիբյանից առաջարկ չի ստացել
«Իմ քայլը» խմբակցության ավագանու անդամ Արմեն Սարգսյանը հերքում է լուրերն այն մասին, թե ինքը պատրաստվում է ստանձնել Օպերայի և բալետի թատրոնի տնօրենի պաշտոնը:
Նա այդ մասին հայտարարեց կառավարության դիմաց կազմակերպված ակցիայի ժամանակ, որտեղ հավաքված արտիստները պահանջում են վերականգնել Կոստանտին Օրբելյանին տնօրենի պաշտոնում և ստորագրահավաք են կազմակերպել՝ Մշակույթի նախարարի պաշտոնակատար Նազենի Ղարիբյանի աշխատանքից ազատման համար:
Արմեն Սարգսյանը լրագրողների հետ զրույցում նշեց, որ իրեն նույնիսկ առաջարկ էլ չեն արել տնօրենի պաշտոնի համար: Ավելին՝ նա ինքն է առաջարկել հարցը դրական հանգուցալուծել:
«Ես ասել եմ, որ պետք է Օրբելյանի հետ խոսել, հասկանալ: Թղթաբանությամբ մի քիչ սխալ է մեծ արտիստի հետ խոսելը: Ինքը պետք է Հայաստանին և հայ մշակույթին»,-ասաց նա:
Արմեն սարգսյանն իհարկե չի ժխտում, որ կարող է կատարել տնօրենի պարտականությունները, սակայն նկատում է, որ մաեստրոյի նկատմամբ սխալ վերաբերմունք են ցուցաբերել:
«Ճիշտ վերաբերմունք չի եղել, ճիշտ չեն խոսել մաեստրո Օրբելյանի հետ: Պետք է ուղղվի այդ վերաբերմունքը: Ես Նազենի Ղարիբյանի կողմից առաջարկ չեմ ստացել: Առաջարկ եղել է արտիստների մի մասի կողմից»,-ասաց Սարգսյանը:
Դիտարկմանը, թե Նազենի Ղարիբյանն է հայտարարել, որ Արմեն Սարգսյանի թեկնածուներից մեկն է, նա արձագանքեց. «Ես չգիտեմ՝ նախարարությունում ով է առաջարկել: Ես այլ թատրոնի տնօրենի առաջարկ եմ ստացել նոյեմբերին: Քանի որ արտիստների մեծ մասի հետ մտերիմ եմ, չեմ վախենում այստեղ գալ և հետին մտքեր չկան»: