«Հարցս նենգափոխել են». Գայանե Աբրահամյանը ՀՀԿ-ի օրոք աշխատածների դեմ ոչինչ չունի
«Հարցս նենգափոխել են. հարց ՀՀԿ-ի օրոք աշխատած մարդկանց չէր վերաբերվում»: Այս մասին Համապետական շաբաթօրյակի շրջանակում կազմակերպված միջոցառման ժամանակ ասաց «Իմ քայլը» խմբակցության պատգամավոր Գայանե Աբրահամյանը՝ անդրադառնալով իր հայտարարությանը, թե ՀՀԿ-ի օրոք աշխատած պաշտոնյան արդյո՞ք կարող է ազնվորեն ծառայել նաև այսօր:
Նա նկատում է, որ հարցը ՀՀԿ-ի օրոք աշխատողների դեմ չէր:
«Հարցս դա չէր, քանի որ այսօր իշխանության մեջ շատ կան ՀՀԿ-ի օրոք աշխատած մարդիկ, հարցը վերաբերում էր ազնիվ ու պրոֆեսիոնալ մոտեցմանը: Հարցը ՀՀԿ-ի օրոք աշխատելու խնդիր չէ, այլ նվիրված աշխատանքի»,- ասաց պատգամավորը:
Նա նկատեց, որ նախարարի պատասխանն իրեն բավարարել է և այդ մասին այլևս չի ուզում խոսել:
Հիշեցնենք, որ մարտի 21-ին ԱԺ տարածաշրջանային և եվրասիական ինտեգրման հարցերի մշտական հանձնաժողովի նիստում դիմելով Տնտեսական զարգացման և ներդրումների նախարար Տիգրան Խաչատրյանին՝ Գայանե Աբրահամյանն ասել էր. «Իմ մտահոգությունը ձեր նախարարության առումով մի փոքր այլ է։ Գերատեսչության մամլո խոսնակի՝ ի դեմս Աննայի, մամլո խոսնակ ունեք, որը տարիներ շարունակ ըստ էության ամբողջությամբ ծառայել է Հանրապետական կուսակցությանը՝ լինելով նաև կուսակցության անդամ։ Ներողություն հարցադրման համար, բայց սա իսկապես կարծում եմ՝ հիմնարար խնդիր է։ Արդյո՞ք նա ազնվորեն կարող է ներկայացնել այն ամբողջ աշխատանքը, որ այսօր է իրականացվում»։
Նախարարը պաշտպանել է իր խոսնակին՝ նկատելով, որ նա պատշաճ կարող է իրականացնել իր աշխատանքը: