Ասում են՝ շատ աշխատեք, շատ կստանաք. ոչ մի իշխանության օրոք սենց արհամարհանքի չենք արժանացել. ԱԺ հավաքարարներ (տեսանյութ)
ԱԺ-ի հավաքարարները հանդիպեցին ԱԺ փոխնախագահ Ալեն Սիմոնյանին, ով պնդեց, թե վերջիններիս աշխատավարձի իջեցման մասին 15 րոպե առաջ է իմացել: Բայց վստահեցրեց՝ եթե շատ աշխատեն, շատ կստանան:
Նրա այս հայտարարությունը, սակայն, հավաքարարների համար հուսադրող չէր:
«Ոչ մի իշխանության օրոք սենց արհամարհանքի չենք արժանացել»: Այդ մասին լրագրողների հետ զրույցում ասացին Ազգային ժողովի հավաքարարները, ովքեր իմացել են՝ 70 000 դրամի փոխարեն այլևս 40 000 են ստանալու:
Նրանք պնդում են, որ ամեն ժողովի ժամանակ իրենց խոստացել են, որ աշխատավարձերը կբարձրանան, սակայն այսօր փաստի առաջ են կանգնեցրել:
«Հլա մի բան էլ ասում են՝ էդ էլա շատ, հաշվարկով ավելի քիչ ա հասնում»,- ասաց հավաքարարներից մեկը:
Մեկ ուրիշն էլ նկատեց, որ ամեն տարին մեկ անգամ իրենք կարողացել են մեկնել հանգստի, իսկ այժմ ստիպված են դիմում գրել ու հեռանալ, քանի որ անհնար է 40 հազար դրամով անել այն աշխատանքը, ինչ արել են երկար տարինեիի ընթացքում:
«Դե թող գնան ուրիշ աշխատող բերեն, տեսնենք՝ ով կգա 40 հազարով, առանց գիշեր-ցերեկ ասելու, առանց ազատ օր ասելու աշխատի: Եթե կգան, կանեն՝ թող գան»,-նկատեցին հավաքարարները:
«98 թվականից էստեղ եմ, ու ոչ մի խնդիր չի առաջացել նախկին իշխանության ժամանակ: Մեզ ասեցին՝ ձեր աշխատավարձին ձեռք չենք տա: Էս տարի պարգևավճար չտվեցին՝ քիչ էր, հիմա էլ ասում են, հետը հավելյալ աշխատեք՝ 40 հազարից ավել կստանաք»,-ասաց հավաքարարներից մեկը և հավելեց. «լավ օրից չեմ ես էսօր վարկերի տակ, ո՞նց եմ փակելու էս աշխատանքով: Իրենց 40 հազար դրամ տան, կաշխատե՞ն, մի օր էլ չեն աշխատի: Իսկ 40 հազարն աշխատավարձ չէ, մենք ուրիշ տեղ էլ կարող ենք 40-ով աշխատել՝ դեռ ավելի շատ»,- ասացին հավաքարարները: