Էշի ականջում քնածը
«Հետհեղափոխական» Հայաստանում իր 40 հազար հեկտար հողով, թռչող կոկորդիլոսով, իր ձվերով ու էլ չգիտես ինչ «օյինբազություններով» աչքի ընկած Արարատի մարզպետ Գարիկ Սարգսյանը հիմա էլ փորձում է «կռուտիտի» վրա վարպետանալ։
Արդեն 7 օր է՝ մարզի Ավշար գյուղում դասադուլ է՝ Գարիկի բերած տնօրենի պատճառով, սակայն նա ո՛չ միայն հարցին լուծում չի տալիս, այլև երկու ոտքը մի մաշիկ դրած՝ «գազ է տալիս», որ իր նշանակած կամ, ինչպես ինքն է ասում, «ընտրված» տնօրեն Հերմինե Անդրեասյանը մնա իր աթոռին։ Չնայած այն բանին, որ գրեթե ամբողջ գյուղը դեմ է տնօրենին՝ նա մարզպետով վեր-վեր է թռնում ու դարձյալ մնում աթոռին։ Ասում ենք, գրեթե, քանի որ մեկ-երկուսը, այնուամենայիվ, պաշտպանում են տնօրենին, դե, ինչպես ասում են՝ գյուղ չկա, որ շուն չլինի, բայց պաշտպանում են, ոչ հենց այնպես, այլ նրա համար, որ, օրինակ, մարզպետի քեռին են ու ազգականը։
Ինչևէ․․․ Չենք քննարկում այն, թե ինչպես է «շահել» նոր տնօրենուհի Հերմինե Անդրեասյանը Գարիկ Սագսյանի ուշադրությունը և ինչու է, ի վերջո, Գարիկն այդքան «վիզ դրել» նրան պահելու համար։ Բայց այստեղ հարց այն է նաև, որ Սարգսյանը չի բավարարվում միայն տնօրենի պաշտոնում իր «հովանավորյալին» նշանակելով։ Նա որոշել է փոխտնօրենի պաշտոնում էլ՝ ո՛չ ավել, ո՛չ պակաս, մորաքրոջ հարսին նշանակել։ Այսինքն՝ տրամաբանական է, որ դրա համար նա պետք է ազատի գործող փոխտնօրեններից մեկին։
Հենց սա էլ վրդովել էր գյուղացիներին ու բավականին մեծ աղմուկ բարձրացրել։ Այստեղ «կռուտիտի» պահն այն էր, որ Սարգսյան Գարիկը նախ փորձում էր հերքել իր բարեկամական կապը, բայց հետո գոնե տնօրենի աթոռը փրկելու համար, տեղի տվեց։ Նա աղմուկը մեղմելու ու գյուղացիներին գոնե մի քիչ լռեցնելու համար, որոշեց մորաքրոջ հարսի հետ կապված հարցն իր օրակարգից հանել։
Դե, համենայնդեպս, մարզպետ Գարիկը հենց ինքն ասաց այդ մասին, երբ վարչապետ Նիկոլ Փաշինյանը Արարատի մարզ շրջայցի էր գնացել։
Ավշարցի մի կին այդ օրը Փաշինյանին պատմեց դպրոցում տեղի ունեցող դասադուլի մասին ու ներկայացրեց լարված վիճակը՝ չմոռանալով նաև մարզպետի մորաքրոջ հարսի մասին ակնարկել։
Գարիկ Սարգսյանը չհերքեց, որ Աստղիկ Հարությունյանն իսկապես իր մորաքրոջ հարսն է, բայց «լեզվից թռցրեց», թե՝ «որ աղմուկ բարձրացավ Էդ խոսակցությունից հետո, էդ հարցն արդեն փակվել ա, էլ ոչ մեկ չի ազատվել»:
Դե նախ դա հարց է, թե ոչ մեկին չազատելն ինչքան կտևի՝ մինչև տնօրենը ոտքը, կամ հետույքը պնդի՞ իր տեղը, թե՞ աղմուկը լռելուց անմիջապես հետո, բայց ակնհայտ է, որ նա փորձեց քողարկել ու «կռուտիտներ» անել իր քաղաքական հոր մոտ․․․
Սա իր հերթին, մյուս կողմից էլ՝ պարզվեց, որ Սարգսյանը մի աչք ծակող «դեֆեկտ» էլ ունի. փոքր ժամանակ երևի նրան լավ չեն դաստիարակել ու չեն սովորեցրել, որ ուրիշների նամակները կարդալն առնվազն գեղեցիկ ու կոռեկտ չէ: Այցին հետևածները տեսան, թե ինչպես էր Գարիկը վիզը ծռել ու Փաշինյանին ուղղված նամակն էր փորձում կարդալ: Սիրուն չէր․․․
Ինչևէ: Փաստն այն է, որ ապագա կոկորդիլոսաբույծ Գարիկի գլխավորած մարզում մեկ շաբաթ է՝ բարձիթողի վիճակ է, իսկ ինքը երկարականջ կենդանու ականջներում քնած՝ մատը մատին չի փորձում տալ:
Չի բացառվում նաև, որ նրա այս հանգիստ ու անտարբեր վիճակը նաև վերևներից ստացած «դաբրո»-ի կամ ամենաթողության արդյունք է, քանի որ այդ վիճակն այսօր քայլարածների համար ստատուս է դարձել։