Մնացականյանն ու Լայչակը հանցավոր համագործակցության են եկել. Աշոտ Գրիգորյան
Օրերս Երևանում էր Սլովակիայի Հանրապետության արտաքին և եվրոպական գործերի նախարար, ԵԱՀԿ գործող նախագահ Միրոսլավ Լայչակը, որը, ըստ Սլովակիայում Եվրոպական հայկական միությունների ֆորումի նախագահ Աշոտ Գրիգորյանի, տվել է սկանդալային պատասխան հնչած հարցին, թե ինչու է կեղծվել Սլովակիայից Ադրբեջան առաքված մահաբեր զենքի լիցենզիան և վերջնական օգտագործողը՝ էնդյուզերը, գրվել է Իսրայել, այն դեպքում, երբ ռազմատեխնիկան ուղարկվել է Ադրբեջան։
Աշոտ Գրիգորյանը NEWSPRESS.am-ի հետ զրույցում, հիշեցրեց իր հայտարարությունները, թե DANA ինքնագնաց հաուբիցներ առնվազն 65 ինքնաթիռով տասը ամսվա մեջ տեղափոխվել է Բրատիսլավիայից ոչ թե Իսրայել, այլ՝ Թել Ավիվով Բաքու: Թել Ավիվում ունեցել են ընդամենը 3-4 ժամանոց դադար, որի ընթացքում փոխվել են փաստաթղթերը:
«Հարցի շուրջ հսկայական աղմուկ բարձրացավ անցյալ տարի հոկտեմբերին Իսրայելում, որի արդյունքում հարուցվեց նաև քրեական գործ և պաշտպանության նախարար Լիբերմանը հրաժարական տվեց: Այս հարցը բարձրացվեց իմ կողմից 2007թ. դեռևս սեպտեմբերին, հոկտեմբերին, այնուհետև ես տարբեր հարցազրույցներում հայտարարեցի՝ իր նմանը չունեցող այս կեղծիքի մասին, որից հետո, ինչպես պարզվեց, ոչ մեկը չի պատրաստվում պատասխան տալու, դրանից հետո ես դիմեցի ԱԱԾ տնօրեն Վանեցյանին՝ պահանջելով հետաքննել գործը, որտեղ կա պետական դավաճանության հստակ կասկած:
Մենք դատի տվեցինք Չեխիայում և Սլովակիայում ՀՀ դեսպան պարոն Տիգրան Սեյրանյանին, ՀՀ ԱԳՆ-ին՝ ի դեմ նախարարն Զոհրաբ Մնացականյանի»,- ասում է մեր զրուցակիցը և իր համոզմունքը հայտնում, որ բոլոր դատական որոշումները լինելու են ի վնաս իրենց և դրա համար արդեն մշակել են իրենց հաջորդ քայլերը:
Աշոտ Գրիգորյանը չափազանց հետաքրքիր և սկանդալային է համարում ԵԱՀԿ գործող նախագահ Լայչակի և Զոհրաբ Մնացականյանի համատեղ ասուլիսը, որտեղ, ըստ նրա, Լայչակն առանց աչք թարթելու և դիվանագետի համար բավականին ոչ վայել կերպով հայտարարեց, որ օգոստոսին իրենք համաձայնություն են եկել ՀՀ ԱԳՆ-ի հետ:
«Այսինքն՝ ո՞նց հասկանանք՝ հանցավոր համագործակցությո՞ւն, այսինքն՝ պարոն Լայչակը կիսվել է Մնացականյանի հե՞տ, թե ինչ-որ բան է առաջարկել իրեն: Ի՞նչ համաձայնության եք եկել, չէ՞ որ ԵԱՀԿ-ն այն մարմինն է, որը հետևում է՝ հանկարծ պատերազմող կողմերին զենք չվաճառվի և խստիվ արգելված է Եվրամիությունից Ադրբեջան զենքի առաքումը, առաջին պատասխանատուն դուք եք, պարո՛ն Լայչակ, և եթե այդ զենքն օգտագործվի մեր երկրի դեմ՝ Ձեր առաջին մեղսագործ ընկերը Զոհրաբ Մնացականյանն է»,- պնդում է Աշոտ Գրիգորյանը:
Մեր զրուցակիցը Զոհրաբ Մնացականյանի պատասխանը որակում է՝ կցկտուր, վախից խելքը կորցրած՝ ոչ դիվանագետի պատասխան: «Մնացականյանի խոսքից պարզ դարձավ, որ, այո, եղել է հանցավոր համագործակցություն, որի համար ինքը շնորհակալություն հայտնեց, փոխարենը բացատրություն տար, թե ինչպես իր հայրենիքի դեմ ապագայում կիրառվելիք սարսափելի զենքը հայտնվեց թշնամու մոտ: DANA մակնիշի զրահապատ մեքենաները, որոնց վրա դրված են հրթիռանետներ, 65 հատ համանման մահաբեր զենք հայտնվել է Բաքվի ձեռքին, որով կարող է ոչնչացնել Արցախը, քանի որ դրանք հզոր քարշակներ ունեն՝ 8 անիվներ, որոնք բոլորը քաշող են, այսինքն կարող են բարձրանալ ցանկացած բարձրունք և այնտեղից հրթիռանետել Արցախը, ինչպես նաև Հայաստանը: Ահա, նման խայտառակ պատասխաններով ավարտվեց 2 պարոնների ասուլիսը՝ բազմաթիվ հարցեր թողնելով մեզ վրա»,- ասաց նա: Զոհրաբ Մնացականյանի այս ելույթից հետո բնական հարց է ծագում. այս հարցում նման տարօրինակ վարք ցուցաբերած դիվանագետն ինչպե՞ս պիտի դիմակայի մեծ փորձ ուեցող և Արցախի հարցին լիովին տիրապետող մեր հակառակորդի՝ Ադրբեջանի ԱԳ նախարար Մամեդյարովի հարձակումներին:
Մեր այն հարցին, թե ինչ պետք է անի այսօր Հայաստանի կառավարությունը, կոնկրետ այս ամեն ինչի պատասխանատու Նիկոլ Փաշինյանը, Աշոտ Գրիգորյանն ասաց. «Անմիջապես պահանջի ԱԳՆ-ից հաշվետվություն, ետ կանչի դեսպանին և հաշիվ պահանջի: Կարճ ասած՝ այս սկանդալը սպասում է իր բացահայտմանը և, եթե վարչապետը համապատասխան լուծումներ չկարողանա տա՝ մենք, ամենայն հավանականությամբ, Եվրոպայում կբարձրացնենք այս հարցը բոլոր հնարավոր ատյաններում, որպեսզի առաջինը պատասխան տա Լայչակը և երկրորդը՝ Հայաստանի այն պատասխանատուները որոնք չեն կարողացել կանխել գործարքը անհասկանալի պատճառներով, իսկ պատճառների պարզաբանումը թողնում եմ միջազգային հետաքննիչ մարմինների վրա, որոնց մենք դիմելու ենք»: