Անձամբ ես առաջնահերթ կուսումնասիրեմ այս հարցը․ Անդրանիկ Քոչարյանը՝ զինծառայողի մահվան դեպքը թաքցնելու մասին
ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը վստահեցնում է՝ պայմանագրային զինծառայողի մահվան դեպքը ՊՆ-ի կողմից չհանրայնացնելու դեպքն անձամբ ինքը կուսումնասիրի։
Լրագրողների հետ նա նկատեց, որ մեխանիզմների բացակայությունն է պատճառը, որ նախկինում, եթե ուշանում էր մեկ-երկու օր, ապա պաշտպանական գերատեսչությունը տեղյակ պահում էր կորուստների մասին:
«Այստեղ, եթե ինչ-որ մեկը թերացել է, հանձնաժողովը հետամուտ կլինի դա բացահայտելու, բայց այստեղ արտառոց մի թաքցնելու բան չկար: Մենք անպայման կուսումնասիրենք»,- ասաց Քոչարյանը։
Ամեն դեպքում, Անդրանիկ Քոչարյանը վստահեցնում է, որ այս դեպքը երբեք նախադեպ չի դառնա․ նախկինում չի եղել նման բան, իսկ հիմա՝ թույլ չեն տա կրկնվի։
«Բա հանձնաժողովն ինչի՞ համար է»,- ասաց Անդրանիկ Քոչարյանը։
Հիշեցնենք, որ 2019 թվականի հունվարի 1-ին՝ ժամը 04:00-ի սահմաններում, ՀՀ ՊՆ N զորամասի մարտական դիրքի պահպանության տեղամասում կրծքավանդակի շրջանում ստացած հրազենային վնասվածքով հայտնաբերվել է նույն զորամասի պայմանագրային զինծառայող Էդգար Էդուարդի Գրիգորյանը: Նա տեղափոխվել է Մեղրի ԲԿ, որտեղ ժամը 08:10-ին մահացել է»: