«Պապա, ե՞րբ ենք գնալու էս ջարդած տնից»․ Արմավիրի մարզպետը քանդվող շենքի բնակիչներին հորդորել է համբերել (ֆոտո)
Արմավիրի մարզի Լենուղի համայնքի 4-րդ կարգի վթարային երկու շենքի 22 ընտանիք ամեն պահի վտանգի մեջ է։
Խնդիրը մի քանի տասնյակ տարվա պատմություն ունի։ Շենքերը կառուցվել են 30-ականներին, ու այս տարիների ընթացքում հիմնանորոգումների չեն ենթարկվել։ Վաղուց իրենց դարն ապրած, շուրջ 90 տարվա խարխլված ու կիսաքանդ շենքերը թվում է՝ ամեն պահի կփլուզվեն։ Խնդրի մասին մի քանի անգամ բարձրաձայնել են լրատվամիջոցները, իսկ պատկան մարմիններն այդպես էլ անհաղորդ են մնացել։ Այնպես որ՝ այսօր շենքերն իրենց բնակիչներով անտեսվել են։
NEWSPRESS.am-ի հետ զրույցում բնակիչներից Մկրտիչ Սահարյանը նկատեց, որ իբր քիչ է անչափահաս երեխաների հետ ապրում են ամեն րոպե փլատակների տակ մնալու վախը սրտում, նաև զրկված են գազից ու կոմունալ բոլոր հարմարություններից։
«Ընդհանրապես ոչ մի հարմարություն չկա՝ սկսած բաղնիք-զուգարանից, խոհանոցից։ Բոլորը մեկ տեղում են։ Պատկերացնո՞ւմ եք՝ ինչ դաժան վիճակում է 22 ընտանիք։ Ջուրը ձեռքով կրում են վերև, հետո էլ կեղտաջրերն իջեցնում ներքև։ Էս շենք ոչ մեկը հարս չի ուզում գալ, իսկ եկողներն էլ էլի հետ են գնում»,- պատմում է մեր զրուցակիցը։
Նրա ընտանիքն այս շենք է տեղափոխվել 30 տարի առաջ։ Մկրտիչ Սահարյանն ինքը 3 անչափահաս երեխայի հայր է։ Հազիվ ընտանիքն է պահում ու սեփական ուժերով նոր տուն գնելու հնարավորություն չի տեսնում, բայց երեխաների հետ այս պայմաններում ապրելու ուժ չունի։ Ասում է, որ շենքի հագահիգիենիկ, անմխիթար վիճակի ու խոնավության պատճառով, երեխաները հաճախ են հիվանդանում։
«10 օրը մեկ 7-8 հազար դրամի դեղ եմ առնում։ Բժիշկն ասում ա՝ տան պայմաններից ա։ Երեխեքս էլ ամեն օր ասում են՝ պապա, ե՞րբ ենք գնալու էս ջարդած տանից։ Երեխաներիս համար մղձավանջ է դարձել արդեն այս տունը»,-ասաց Մկրտիչ Սահարյանը։
Այս շենքերը թվով 3-ն էին․ 2015 թվականին մի շենքի բնակիչներին կառավարությունը գումար հատկացրեց՝ 6 մլն 600 հազար դրամ, իսկ երկու շենքերի բնակիչների ճակատագիրն այդպես էլ մնաց օդում կախված։
Բնակիչների խոսքով՝ իշխանափոխությունից հետո դիմել են նաև Արմավիրի նոր մարզպետին՝ Համբարձում Մաթևոսյանին, սակայն վերջինս հորդորել է համբերել։
«Համբերելու տեղ այլևս չի մնացել․ ինչի՞ն համբերենք, երբ շենքն ամեն պահի կարող է փլուզվել։ Սա հրատապ հարց է»,- նկատեց մեր զրուցակիցը՝ հավելելով, որ նույնիսկ չի էլ եկել տեսնի, թե ինչ վիճակում է շենքը։
NEWSPRESS.am-ը փորձեց կապ հաստատել նաև մարզպետի հետ՝ հասկանալու համար, թե ինչ ընթացքի մեջ է խնդիրը։ Մարզպետարանից պատասխանեցին, որ Համբարձում Մաթևոսյանը խորհրդակցության է։ Նրանք հետաքրքրվեցին, թե ինչ հարցով ենք զանգահարել և հատնեցին, որ խորհրդակցությունն ավարտելուն պես՝ մարզպետը կզանգահարի։ Սակայն մեկ ժամվա ընթացքում այդպես էլ զանգ չստանալով, որոշեցինք կրկին զանգահարել։ Այս անգամ արդեն ոչ ոք չպատասխանեց մեր հեռախոսազանգին։
Պատրաստ ենք հրապարակել նաև մարզպետի պարզաբանումը։
Արմինե Մկրտումյան