ԲՏՌ․ նոր նախարարություն, որի մասին ոչ մի ինֆորմացիա չկա. ի՞նչ է սա
Կառավարությունը կրճատում է նախարարությունների թիվը։
Գործադիրը շրջանառության մեջ է դրել «Կառավարության կառուցվածքի ու գործունեության մասին» ՀՀ օրենքում փոփոխություններ և լրացումներ անելու մասին նախագիծը, որով առաջարկում է կրճատել նախարարությունների թիվը՝ 17-ից հասցնելով 12-ի։
Համաձայն փոփոխությունների՝ նախատեսված է ստեղծել բարձր տեխնոլոգիաների և ռազմարդյունաբերության նախարարություն՝ ռազմարդյունաբերական կոմիտեի և տրանսպորտի, կապի և ՏՏ նախարարության միավորմամբ։
Հետաքրքիր է, որ կառավարության կառուցվածքային այս փոփոխությունները չեն դրվել հանրային և մասնագիտական քննարկման, դրանց ստեղծման և փոփոխությունների նպատակահարմարությունների մասին մասնագետներն անգամ խուսափում են գնահատական տալ, քանի որ հիմնավորումներ դեռևս չեն լսել։
«Ռազմինֆո» մասնագիտացված կայքի համակարգող Կարեն Վրթանեսյանը թեև բավականին ծանոթ է ոլորտին, սակայն մտահոգող մի շարք հարցերի պատասխաններ դեռևս չի ստացել։
Վրթանեսյանը NEWSPRESS.am-ի հետ զրույցում այս առիթով հարցեր բարձրացրեց և ակնկալեց կառավարության մեկնաբանությունը՝ ինչպե՞ս է հիմնավորվում այս միավորումը, ո՞վ է առաջարկել և ովքե՞ր են մասնակցել քննարկումներին, ո՞րն է նպատակահարմարությունը, ինչո՞ւ է առաջարկվում ունենալ Ռազմական արդյունաբերության նախարարություն, բայց, միևնույն ժամանակ, չունենալ Արդյունաբերության նախարարություն։ Պարզ չէ անգամ՝ այդպես է լինելու, թե՝ ոչ։
Լավ կլինի՝ այս հարցադրումները բարձրացվեն կառավարության առաջ. ի վերջո՝ ինչո՞վ է դա հիմնավորվում։
«Գուցե լուրջ հիմնավորումներ կան, կարիքը կա, սակայն ես համարում եմ, որ առանց քննարկման և առանց բավարար ինֆորմացիայի դա իրագործելը սխալ է։ Նախկին իշխանություններին շատ էին մեղադրում, որ առանց քննարկումների, առանց հանրային կարծիքը հաշվի առնելու՝ կտրուկ քայլեր էին անում: Նոր իշխանությունները շանսեր ունեն այդ մեղադրանքներից խուսափելու»,- ասում է Վրթանեսյանը։
Նշենք նաև, որ այս առիթով ՀՀԿ-ական Արփինե Հովհաննիսյանը ևս իր կարծիքն է հայտնել. նրա մոտ ևս անպատասխան հարցեր են առաջացել, և նա իր ֆեյսբուքյան էջում գրել է․
«Հաշվի է առնվել նախարարի նախասիրությունը կամ մասնագիտացումը, թե՞ հաշվի է առնվել ՀՆԱ-ի մեջ այդ ոլորտների «մեծ» ծավալը կամ արդյոք ռազմական արդյունաբերության դեպքում հաշվի առնվել է, որ ներքին շուկան չափազանց փոքր է զարգացում ապահովելու համար, իսկ արտաքին շուկայի վրա հաշվարկի առումով ո՞րն է լինելու մեր մրցունակության հիմնական գրավականը` տրանսպորտային հարմար լոգիստիկա՞ն թե հմտոթյուննե՞րը, գուցե սարքավորումնե՞րը, ինչ տրամաբանությամբ են հենց այս երկուսը առանձնացվել, եթե ռազմադյունաբերության մեջ առաջատար երկրներում առանձին նախարարություններ չկան: Նույն հաջողությամբ կարելի էր նաեւ ստեղծել ոսկերչության նախարարություն՝ հաշվի առնելով մեր փորձառությունը այս ոլորտում եւ գուցե ՀՆԱ-ի մեջ ավելի մեծ տոկոսը»։
NEWSPRESS.am