Պասերով, պասերով...
Այսօր հետաքրքիր մի նախաձեռնությամբ և հայտարարությամբ է հանդես եկել վարչապետի պաշտոնակատար Նիկոլ Փաշինյանի կինը՝ Աննա Հակոբյանը: Նա կոչ է անում հանրությանը՝ լանչը կազմակերպել «Ոսկեվազ» գինետանը և պատվիրել «Սիթի օֆ սմայլ» աղցան: Այն արժե 1800 դրամ, և այդ գումարն ամբողջությամբ փոխանցվելու է քաղցկեղով հիվանդ երեխաների բուժման ֆոնդին:
Նպատակի համար կլռենք:
Հայտնի փաստ է, որ «Ոսկեվազ» գինետունը պատկանում է դերասան Հովհաննես Ազոյանին: Ի դեպ, Ազոյանն այս իշխանություններից ոչինչ չստացած, բայց անդավաճան համակիրներից է: Դեռևս չբացահայտված է մնում, թե ինչու Փաշինյանն այդպես էլ Ազոյանին մի պաշտոն չտվեց կամ գոնե պատգամավոր չդարձրեց: Կա կարծիք, որ Ազոյանին հաստիք տալը հեղինակազրկման ռիսկ են համարում ՔՊ-ում, քանի որ վերջինս բավականին խոցել է իր անձնական հարաբերություններում:
Ինչևէ, ակտիվ համակրին պետք է ինչ-որ ձև սիրաշահել, այլապես՝ վաղ թե ուշ մարդը սկսում է իր անձնական շահի մասին մտածելով՝ փոխել ուղին և տեսակետները:
Հովհաննես Ազոյանի հարցն իր վրա է վերցրել Աննա Հակոբյանը. նա բոլորովին անմեղ նպատակով, բայց կարևորը մեծ հնչեղությամբ ծրագիր է նախատեսել, որով կոչ է անում նախկինում բարձր համբավ ունեցող, այսօր բիզնեսի առումով հետընթաց ապրող ռեստորանում լանչ անել: Սա Աննա Հակոբյանի կողմից յուրօրինակ ժեստ է՝ ուղղված Հովհաննես Ազոյանին:
Ի դեպ, ռեստորանի ֆեյսբուքյան էջում նաև առաջարկ կար այցելուներին՝ ընտրության օրը Փաշինյանի քաղաքական թիմի հաղթանակը տոնել հենց իրենց մոտ:
Ստացվում է, սկսվել է «պասերով» խաղ՝ իշխանությունների ու Ազոյանի միջև: Նման դեպքեր հիշում ենք նաև, օրինակ, Ռիտա Սարգսյանի և հայտնի դիզայներ Նուռի, երգահան Ավետ Բարսեղյանի, երգիչ Մհերի միջև: Նրանց այդպես էլ պաշտոն չտրվեց, բայց միշտ վայելեցին իշխանության աջակցության հզոր ուժը:
Հին պատմությունները կրկնվում են նորերի մոտ: