Շենգավիթի թաղապետ նշանակելով՝ Փաշինյանն «ապտակեց» նաև հարազատ մորաքրոջը
Երևանի քաղաքապետ Հայկ Մարությանի որոշումը Ռազմիկ Մկրտչյանին Շենգավիթ վարչական շրջանի ղեկավար նշանակելու մասին` ցնծությամբ չի ընդունվել: Քաղաքապետարանի մեր աղբյուրի համաձայն` քաղաքապետարանի աշխատակիցներից շատերը լուրը քմծիծաղով են ընդունել, իսկ ոմանք՝ քաղաքապետի աչքից հեռու, նույնիսկ սկսել են ծաղրել նշանակումը:
Ինչևէ, ոչ մի տեղ չաշխատած ու անփորձ երիտասարդը նշանակվել է Շենգավիթի թաղապետ:
NEWSPRESS.am-ն ավելի վաղ հրապարակել էր, որ ՔՊ վարչության անդամները դեմ են եղել Ռազմիկ Մկրտչյանի նշանակմանը, հովանավորողները եղել են ԿԳ նախարար Արայիկ Հարությունյանն ու Փաշինյանի եղբորորդին՝ Սիփան Փաշինյանը:
Դժվար է ասել, թե Սիփան Փաշինյանն ինչո՞ւ է շահագրգռված եղել Մկրտչյանի նշանակման հարցում, և ինչո՞ւ է վարչապետի պաշտոնակատար Նիկոլ Փաշինյանը տեղի տվել իր եղբորորդու ցանկությանը: Պարզապես հարկ է նկատել, որ Փաշինյանի կողմից Ռազմիկ Մկրտչյանին պաշտոնի նշանակելը հենց Փաշինյանի ինքնասիրության ոտնահարման հարց է:
Մեզ հասած տեղեկություններով՝ Փաշինյանի մորաքրոջ որդին, այսինքն՝ այն կնոջ, ով պահել և մեծացրել է Փաշինյանին, խնդիրներ է ունեցել Ռազմիկ Մկրտչյանի հետ: Ասում են՝ այդ խնդիրները կապված են Ռազմիկ Մկրտչյանի «ախորժակի» հետ: Վերջինս ամեն գնով ցանկացել է Շենգավիթի թաղապետի պաշտոնն իր ձեռքը վերցնել, իսկ Փաշինյանի մորաքրոջ տղան, կռահելով Մկրտչյանի հետին մտադրությունները, մշտապես տարբեր խնդիրների շուրջ վեճեր է ունեցել երիտասարդի հետ:
Մեր աղբյուրի համաձայն՝ Ռազմիկ Մկրտչյանն իր «թայֆով» վիճաբանության մեջ է մտել Փաշինյանի մորաքրոջ տղայի հետ. ասել է թե՝ եղբորը, ում հետ մեծացել է Փաշինյանը:
Ու չնայած դրան՝ Փաշինյանի թողտվությամբ՝ Ռազմիկ Մկրտչյանը դառնում է թաղապետ:
Ասում են՝ Ռազմիկ Մկրտչյանը շանտաժ է արել, ասում են՝ նրա հետ կապված այլ ակնկալիքներ ունեն... Կան նաև այլ վարկածներ, սակայն ինչ էլ որ լինի՝ հատկանշական է, որ այստեղ կա նաև պատվի և ինքնասիրությունան խնդիր, որն անտասվել է:
Մի կողմ թողնենք նաև այն, որ մեզ հասած լուրերի համաձայն՝ այս ջահելի նշանակմանը դեմ են եղել ու դեռ ընդդիմանում են շենգավիթցիների մեծ մասը: Նկատենք միայն, որ Փաշինյանը պաշտոն է տվել իր եղբոր վրա ձեռք բարձրացնողին՝ այդկերպ, փաստորեն, արհամարհելով ու անտեսելով նաև կնոջը, ով, հատկապես նրա մոր մահից հետո, սրտացավ վերաբերմունք է դրսևորել իր քրոջ որդու նկատմամբ...
Այլ կերպ ասած՝ Շենգավիթի թաղապետ նշանակելով՝ Փաշինյանն «ապտակեց» նաև իրեն սնած ու պահած հարազատ մորաքրոջը: