Փաշինյանին թվում է, թե ինքը «ցարի բոգն» է. Աշոտյանը Փաշինյանի ասուլիսը «ագրեսիվ» է որակում
ՀՀԿ խմբակցության պատգամավոր Արմեն Աշոտյանը վարչապետի ժ/պ Նիկոլ Փաշինյանի ասուլիսն ագրեսիվ է որակում: Նա լրագրողների հետ զրույցում անդրադառնալով ասուլիսին՝ նկատեց, որ Փաշինյանը նյարդայնացած էր, թե ինչու՝ բացատրեց.
«Երևի երկրի սոցիալ-տնտեսական խնդիրների բեռն է սկսել գիտակցել, երևի իրեն զեկուցել են, որ երբ իշխանությունն ստանձնում էր, ուներ մոտ 22 մլրդ դրամի հավաքագրված պետբյուջե, իսկ հիմա անգամ սեպտեմբեր ամսվա պլանը թերակատարվել է մեկ մլրդ դրամով: Երևի զեկուցում են, որ արտաքին քաղաքական մարտահրավերներ կան, և զգում է, որ եթե դեկտեմբերի 9-ին ստանա 80 տոկոս, այլևս չի կարող դիմադրել որևէ միջազգային ճնշումների ղարաբաղյան հարցով»:
Դիտարկմանը, թե այդ ամենը ՀՀԿ-ի թողած ժառանգությունն է, Աշոտյանն արձագանքեց, թե իրենք թողել են այնպիսի ժառանգություն, որն անցած 7 ամսվա ընթացքում Փաշինյանն ու «սիրողական» թիմը մսխել են:
Նա հիշեցրեց հեղափոխական շարժման ժամանակ Փաշինյանի ելույթներն ու խոստումները, որոնք այսօր իրականություն չեն դարձել: Ավելին՝ նրա գործելաոճը հիասթափություն է առաջացրել շատերի մոտ:
«Այն ժամանակ, երբ վարչապետ էիք ընտրվում՝ ասեիք, որ փակելու եք գիտակրթական հիմնադրամներ, որ խոպանչիներին հարկելու եք, եթե դա ասվեր ապրիլ-մայիսին՝ հրապարակում քանի՞ մարդ կշրջվեր ու կասեր՝ սա մեր թեկնածուն չի: Հիմա մենք այդ բոլորը հիշեցնում ենք որպես «будильник»: Այո, սա հակաքարոզ է: Եթե ինքը քարոզում է, եթե ինքը ՀՀԿ-ականներին «հաթաթաներ» է տալիս, թե «ձեր հալը կտենաք»... դա վարչապետի՞ բառապաշար է»,- նկատեց Աշոտյանը՝ հավելելով. «Մի փորձեք ինձ մոտ Նիկոլ Փաշինյանին պաշտպանել, իրեն թվում է, որ ինքն արդեն ցարի բոգն է, ալֆան ու օմեգան է»: