Տոտալ խաբոցի

Վարչապետի պաշտոնակատար Նիկոլ Փաշինյանն այսօր հրավիրեց հերթական մամուլի ասուլիսը, որը տևեց երեք ժամից ավել։

Իհարկե՛, բոլորս սպասում էինք, որ Փաշինյանն իշխանությունը ստանձնելուց 7 ամիս անց կգիտակցի իրեն տրված գործի ողջ պատասխանատվությունն ու դրա բացակայության հետևանքը, սակայն, ստացվեց այնպես, ինչպես միշտ։

Այսօր էլ որպես «շուստրի» և ճարտար հռետոր Փաշինյանն իր ասուլիսը սկսեց հայկականության նկատմամբ տածած իր խորին զգացմունքներն ի ցույց դնելով և սկսեց հայկական արտադրանքը խրախուսելու մասին իր պատկերացումների շռայլմամբ՝ ժամացույցից և կոստյումից անցում կատարելով այս անգամ փողկապին․

Փաշինյանը հերթական «տրյուկն» էր արել՝ կապել էր եռագույն փողկապ՝ ցույց տալով որ այդ կերպ խթանում է հայկական արտադրանքն ու ասել է թե՝ երկրի տնտեսությունը։

Բայց ինչպես ասում են՝ Փաշինյանն արդեն սպառել է ձեռքի տակ եղած PR գործիքակազմը և նման էժանագին տրյուկներն այլևս համոզիչ չեն, և դա հատկապես այն համատեքստում, որ մարդիկ սկսել են իրենց կաշվի վրա զգալ, որ հեղափոխությունից հետո և՛ հայկականի, և՛ ոչ հայկականի համար սկսել է ավելի թանկ վճարել, սկսել է ավելի վատ ապրել, իսկ դրա պատճառները բերենք թվերով։

Ներդրումային միջավայրի խաթարում, 100 մլն դոլարի ներդրումներից անկում՝ 11 անգամ։ 6,5 տոկոսանոց տնտեսական աճին հաջորդող 4,5 տոկոս տնտեսական աճ, որին ավելացել է 3,5 տոկոսանոց գնաճը։

Փաշինյանն այսօր հրավիրված ասուլիսի ժամանակ բարձրաձայնում է, որ 3 հազարից ավելի աշխատատեղ է ստվերից դուրս բերել․ դուրս է բերել լավ է արել, իսկ քանի նոր աշխատատեղ է ստեղծել պարոն Փաշինյանը։

Փաշինյանն այսօրվա ասուլիսում հայտարարեց, որ կառավարությունն իր առաջ դրած բոլոր խնդիրները կատարել է հարյուր տոկոսով, իսկ մի՞թե կառավարությունն իր առաջ խնդիր էր դրել հեղափոխություն կատարած ժողովրդին մղել աղքատության, նվազեցնել նրանց եկամուտներն ու ստիպել ամեն ինչի համար թանկ վճարել։

Մի՞թե սրա համար էր պայքարը և արդյոք սա՞ էր նոր կառավարության տեսլականը։

Այս համատեքստում մի կողմ ենք թողնում հարկային համաներումների, վերացող կարմիր գծերի և քաղաքացիներին աջ ու ձախ տուգանող տեսախցիկների մասին, որոնք Փաշինյանը վարչապետ դառնալուց առաջ անընդունելի, իսկ հիմա ընդունելի է համարում։

Չխորանալով Փաշինյանի կառավարության տնտեսական քաղաքականության մյուս խայտառակություններին մեջ՝ հարկ ենք համարում շեշտել, որ Փաշինյանին չի փրկի անգամ իր եռագույն փողկապը, որովհետև դա բացարձակապես որևէ աղերս չունի այն իրականության հետ, որի մեջ ապրում է ՀՀ արժանապատիվ քաղաքացին։

Իսկ արժանապատիվ քաղաքացին սկսել է ապրել ստի և սպասման մեջ, ուստի Փաշինյանից պահանջում է վերջ տալ տոտալ ստին ու խաբեությանը և գործել՝ անվերջ ու վստահ խոսելու փոխարեն։

NEWSPRESS.am