Ակունք անճարության...
Մինչ դեկտեմբերի 9-ին կայանալիք արտահերթ խորհրդարանական ընտրություններին մասնակցող կուսակցություններն ու դաշինքները խելքներին զոռ տված՝ մտածում են իրենց խոսքը հասարակությանը հասցնելու ամենակարճ ճանապարհի՝ իրենց քաղաքական թիմի կարգախոսի մասին՝ պարզվում է՝ «Իմ քայլը» դաշինքում, ինչպես բոլոր հարցերում, այնպես էլ կարգախոս ընտրելու, նախընտրել են խելքին զոռ չտալ:
Փաշինյանի հմայքով պատգամավոր կարգված Ալեն Սիմոնյանը բստրել է «Իմ քայլը» դաշինքի խորհրդարանական ընտրությունների կարգախոսը. քցել-բռնել ու հասկացել է, որ դա պետք է լինի՝«Նիկոլ՝ վարչապետ»-ը:
Սա, մեղմ ասած, վկայում է այս քաղաքան թիմի անճարության մասին, թեև անճարությունն ամբողջությամբ չի բնորոշում իմքայլականներին, որոնք լծված են՝ չգիտես՝ պատեկանաշինությա՞ն, թե՞ պետականափլուզման գործին:
Այս ջահելներն ամիսներ շարունակ փաստում են, որ բացի ֆեյսբուքյան լայվերից, որևէ լուրջ գործի ընդունակ չեն, քանի որ չունեն մասնագիտական հմտություն, իսկ որ ամենավատն է՝ իմացողից չեն էլ ուզում սովորել:
Մի՞թե հեղափոխական Հայաստանում այս 7 ամիսների ընթացքում այլ կարգախոսով հանդես գալու մտահղացում այս քաղաքական թիմը չունեցավ, և մի՞թե նրանց գերնպատակը միայն «Նիկոլ՝ վարչապետ»-ն է:
Սա, թերևս, սպասելի է, քանի որ փաշինյանական թևն այդպես էլ չկարողացավ խելք- խելքի տալ և որևէ հարցում խորքային մի գործ անել:
Իսկ խորքային գործերի բացակայության օրինակները շատ են: Ահավասիկ՝
արտաքին քաղաքականություն՝ ինչո՞ւ տանջվել նոր բան անելու համար, ՀՀԿ-ի արածը կշարունակենք,
ներքին քաղաքականություն՝ ինչո՞ւ տանջվել, որևէ ոլորտի համար մի նոր բան անել. կրկին ՀՀԿ-ի ծրագրերը կշարունակենք,
ինչո՞ւ խելքներիս զոռ տանք և 2019 թվականի համար բյուջե գրենք. 2018 թ.-ի ՀՀԿ-ի գրածը կվերցնենք, անունն իներցիոն դնելով՝ կտանենք 2019 թ:
Ու, ստացվում է՝ նույն ինչուն է նաև կարգախոսի ընտրության հարցում.
ինչո՞ւ նոր բան մտածենք. «Նիկոլ՝ վարչապետ»-ը լավագույնս բնորոշում է մեզ ու մեր քաղաքական կշիռը, չէ՞ որ Նիկոլը հանես՝ տակը ոչ մենք կմնանք, որ քաղաքական կշիռը:
Ու անճարակներն են, որ գալու են բացարձակ իշխանության՝ կրելով իշխանության բարիքները, իսկ պատասխանատվությունն ու գործը՝ կսպասեն: