ՀՀԿ-ականները թող բացատրեն՝ ինչու են Հայ եկեղեցու արժեքների մշուշի ներքո ներկայացնում անվտանգության հարցը․ Վահե Էնֆիաջյան
Հայ առաքելական եկեղեցու կամ հոգևոր առաջնորդի անվտանգությունն ապահովելու համար անհրաժեշտ չէ օրենք ընդունել։ Այդ մասին NEWSPRESS.am-ի հետ զրույցում ասաց «Ծառուկյան» խմբակցության քարտուղար Վահե Էնֆիաջյանը՝ անդրադառնալով ԱԺ-ում «Հատուկ պետական պաշտպանության ենթակա անձանց անվտանգության ապահովման մասին» օրենքում լրացումներ կատարելու մասին օրինագծի տապալմանը։
Նրա դիտարկմամբ՝ Հայ առաքելական եկեղեցու դերը, նշանակությունը՝ մեր պետության, մեր ազգի պահպանման և մեր ապագայի հետ կապված, որևէ քննարկման չի կարող ենթարկվել։ Էնֆիաջյանի խոսքով՝ «Ծառուկյան» խմբակցությունը պատրաստ է ամեն կերպ աջակցել եկեղեցու անվտանգության պահպանմանը՝ առանց օրենքի միջամտության։
«Այսօր, եթե անվտանգության հարց են ակնարկում, ապա դրա համար անհրաժեշտ չէ օրենքի ընդունումը։ Հենց այսօր էլ իրավապահ մարմինները կարող են միջոցառումներ ձեռնարկել, եթե նմանատիպ խնդիր կա։ Համապատասխան միջոցառումներ կձեռնարկվեն այնքան ժամանակ, որքան դրա անհրաժեշտությունը կա։ Ընդ որում՝ գիտեք, որ կա ծառայությունը, որը կարող է թե՛ ուղեկցել, թե՛ անվտանգություն ապահովել․ բոլոր տարբերակներն իրավական հարթության մեջ կիրառվում են և կարող են օգտագործվել անվտանգության ապահովման համար»,- ասաց Վահե Էնֆիաջյանը։
Արձագանքելով դիտարկմանը, թե ՀՀԿ-ն քվեարկությունը և օրինագծի տապալումը որակեց խայտառակություն և սրբապղծություն, պատգամավորը նկատեց, որ իրենց դիրքորոշումն անվանդական է և անփոփոխ՝ «Ծառուկյան» խմբակցությունը Հայ առաքելական եկեղեցու դավանանքի կրողն է։ Վահե Էնֆիաջյանի համոզմամբ՝ ՀՀԿ-ն անվտանգությունը ներկայացնում է Հայ եկեղեցու արժեքների մշուշի ներքո։
«Մենք մշտապես հանդես ենք եկել ավանդական դիքորոշմամբ, և այսօր էլ վերահաստատում եմ մեր մոտեցումները: Բերել մեկը մյուսի հետ խառնել և այլ մշուշի տակ ներկայացնել այդ ամենը, պարզապես չեմ ընդունում։ ՀՀԿ-ականները թող այդ ու մի շարք այլ խնդիրներ բացատրեն և ասեն, թե ինչու են նման ձևակերպումներով հանդես գալիս»,- ընդգծեց Էնֆիաջյանը։
Հիշեցնենք, որ նշված օրինագիծը տապալվեց․ կողմ էր ընդամենը 28 պատգամավոր: