Ծերեթելիի կոնտինգենտից և՞ս ցուցակում մարդիկ կան․ հարգելի կոլեգա, ա՞յս թիմով եք պատրաստվում երկիր ղեկավարել
Առանձին մարդիկ, իհարկե, թող ինձ ներեն, բայց «Իմ քայլը» դաշինքի թեկնածուների ցուցակն ուղղակի աղետալի է: Հրապարակված ցուցակից ակնհայտ է դառնում Փաշինյանի կադրային սովը: Կրկին առաջնայնությունը տրվել է այն երիտասարդներին, ովքեր կառավարության թիմում արդեն հասցրել են աչքի ընկնել իրենց անփորձությամբ։
Երբ քննադատվում էր Փաշինյանի կառավարական թիմը, ասում էին՝ ստեղծվել է ժամանակավոր կառավարություն և անփորձների փոփոխություններ դեռևս կլինեն, բայց այդպես էլ չտեսանք այն փորձառուներին, ովքեր պետք է լրացնեին մասնագետի սովը:
«Իմ քայլը» դաշինքի թեկնածուների այս աղետալի ցուցակում, ով ասես՝ կա, ինչ տիպի մարդ ասես, կա՝ սկսած փողով նյութ գրող լրագրողից, վերջացրած ամբիցիոզ, բայց կյանքում ոչնչի չհասած ջահել-ջուհուլներ:
Հետաքրքիր է՝ Ծերեթելիի կոնտինգենտից և՞ս այս ցուցակում մարդիկ կան, վերջին շրջանում ոստիկանությունը մեծ որս էր սկսել, գուցե ՔՊ ցուցա՞կն էին կազմում:
Ինչևէ, ցուցակում մարդիկ են, ովքեր հեղափոխությունից հետո միայն ջրի երես դուրս եկան իրենց միակ առավելության շնորհիվ՝ այն է կարողացան քայլել ու ճանապարհ փակել, թե չէ՝ ցուցակ կազմելիս հաստատ հաշվի չի առնվել, թե մարդն ինչ անցած ճանապարհ ունի կամ ինչ կրթական ցենզ:
Եթե ցուցակից հանենք այսօրվա նախարարներին, փոխնախարարներին, մարզպետներին՝ տակը մնում է ավելի թույլ մասսա, որով էլ Փաշինյանը կլցնի խորհրդարանը:
Ես չեմ կարող պնդել, որ խորհրդարանում նախորդներն ավելի լավն են, քան այս մարդիկ, բայց որ այս նորերը ոչ մի շանս չունեն ավելի լավը լինելու, գրեթե ակնհայտ է:
Մարդիկ են, ովքեր ունեն 0 վարկանիշ, հանրությունը նրանց չի ճանաչում, շատերին անգամ լրագրողները չգիտեն և այս մարդիկ, փաստորեն, լինելու են խորհրդարանում և մեր ապագան որոշեն:
Չեմ խոսում այն մասին նաև, որ թույլ է առանձին ոլորտներում մասնագետների ներառվածությունը։ Օրինակ՝ ցուցակում մեկ-երկու տնտեսագետ կա, որ հնարավոր է մի նորմալ օրենքի նախագիծ ներկայացնեն, իսկ մնացած դեմքերը խորհրդարանում տանելու են միայն իրենց թելադրված քաղաքական գիծն ու վերջ, այդտեղ կավարտվի նրանց առաքելությունը, քանի որ ավելին պահանջել տորիչելյան դատարկություն հիշեցնող ուղեղներով այս մարդկանցից՝ պարզապես միամտություն կլինի:
Փաշինյանի կողմից նման ցուցակ կազմելը խոսում է իր թուլության և իր՝ իսկապես ժամանակավոր լինելու մասին: Այս խորհրդարանով և գործադիրով Փաշինյանը չի կարող հաստատուն դիրքերում մնալ:
Եվ վերջում՝ հարգելի՛ կոլեգա, ա՞յս թիմով եք պատրաստվում երկիր ղեկավարել, եթե այո՝ ապա Դուք կձախողվեք, որովհետև Ձեզ շրջապատել եք այն չաշխատող 800.000-ով, որովհետև նրանցից քչերն ունեն նորմալ կենսագրություն, աշխատանքային փորձ և մենք՝ այն 350.000-ս պետք է աշխատենք, որ քո չաշխատող թիմն աշխատավարձ ստանա:
NEWSPRESS.am-ի հիմնադիր՝
Արմենուհի (Արիանա) Հովսեփյան