Դուխով անում են ու չեն մտածում․ Խաչատուրովը չի նստի, սրանց համար գլխավորը խայտառակ անելն ու բաց թողնելն է. Եղիազարյան
ԱԱԾ նախկին փոխտնօրեն Գուրգեն Եղիազարյանի համոզմամբ՝ ՀԱՊԿ նախկին գլխավոր քարտուղար Յուրի Խաչատուրովը չի նստելու։ Նա այսօր լրագրողների հետ զրույցում նկատել է, որ Խաչատուրովի նկատմամբ քրեական գործն արժանանալու է մյուս քրեական գործերի բախտին։
«Խաչատուրովը չի նստելու, որովհետև սրանց համար գլխավորը միայն քրեական գործ հարուցելն է, մարդուն խայտառակ անելը, անունը հանելը, հետո՝ բաց թողնելը։ Խաչատուրովին նախ պետք է հետ կանչեին ՀԱՊԿ գլխավոր քարտուղարի պաշտոնից, ապա նոր նրա նկատմամբ քրեական գործ հարցեին»,- նշեց նա։
Գուրգեն Եղիազարյանի կանխատեսմամբ՝ Հայաստանը ՀԱՊԿ–ում կկորցնի գլխավոր քարտուղարի պաշտոնը, որն ըստ նրա՝ իշխանությունները շուտով կորակեն հաղթանակ։
«Խաչատուրովի դեմ քրեական գործ հարուցեցին, ցանկացան լիկվիդացնել, իսկ արդյունքում ստացանք այն, ինչ ստացանք: Խաչատուրովը հասցրել էր գործունեություն ծավալել 1.5 տարի, ևս այդքան ժամանակ կար: Նրան փոխարինելու համար լավ թեկնածու էին առաջադրել՝ պաշտպանության նախկին նախարար Վաղարշակ Հարությունյանին, ով սրանց բերած թեկնածուների մեջ գուցե ամենալավն էր: Կասե՞ք, թե ով է մեղավոր: Մարդիկ, երբ մի գործ անում են, պետք է մի քիչ մտածեն: Դուխով անում ու չեն մտածում: Հա, մարդուն հետ կանչեիք, նոր քրեական գործը հարուցեիք: Ես տեսել եմ, թե քանի գործ եք հարուցել, ու արդյունքում ի՞նչ է եղել: Դա էլ 100 տոկոսով նույն բախտին կարժանանա ու կարժանանա»,- նկատում է Եղիազարյանը:
Նա ևս մեկ անգամ կրկնում է, որ նման ձևով չեն վարվում, քանի որ դա սխալ քաղաքականություն է։
«Ինչպե՞ս կվարվեին: Սա ուղղակի ծաղրուծանակ էր ՀԱՊԿ-ի հանդեպ, ինչն էլ նոյեմբերի 8-ին հանգուցալուծվեց ադեկվատ պատասխանով: Մեր թեկնածուն դուրս մղվեց գործընթացից, մնացին երկուսը՝ Խաչատուրովի տեղակալն ու Բելառուսի անվտանգության խորհրդի ղեկավարը»,- ասաց ԱԱԾ նախկին պաշտոնյան: