Տաբատ հագնելը դեռ տղամարդու արժանապատվություն չէ. Գասպարյանի անունով տարածված տեսանյութը լկտի սուտ է
Մի քանի օր է՝ համացանցում պտտվում է մերկ կնոջ մի տեսանյութ: Այն համացանցում հայտնվել է ոչ ինքնանպատակ. ասում են, թե իբր այդ մերկ կինն Էջմիածնի քաղաքապետի ժամանակավոր պաշտոնակատար և նաև քաղաքապետի թեկնածու Դիանա Գասպարյանն է:
Անկեղծ լինելու համար, պետք է ասել, որ տեսանյութում ամենևին էլ Դիանան չէ. կան հավաստի տեղեկություններ և նաև դա ակնհայտ երևում է:
Այս տեսանյութը տարածողն այնքան էժանագին է, որքան նրա կատարած քայլը:
Դարձյալ անկեղծ լինելու համար պետք է ասենք՝ մեկ անգամ չէ, որ NEWSPRESS.am-ն անդրադարձել է Դիանա Գասպարյանի կայացրած սխալ որոշումներին, և այն ձայնագրություններին, որոնք ինքնին արդեն սև բիծ են թողնում Գասպարյանի անվան վրա:
Ասում են նաև՝ քաղաքապետի այս երիտասարդ պաշտոնակատարն առիթը բաց չի թողնում Էջմիածնի քաղաքապետի մյուս թեկնածուների ու նրանց համակիրների երեսին շպրտելու, որ ինքն է իրական թեկնածուն և ինքն է անցնելու, քանի որ Նիկոլ Փաշինյանն իրեն է առաջադրել:
Սա, իհարկե, ևս տհաճ երևույթ է, քանի որ, ինչպես նախկինում, պարզվում է՝ այսօր էլ կրկին սկսում ենք գործ ունենալ միակուսակցական իշխանության հետ:
Սակայն թվարկված վերոհիշյալ բացասական երույթները քաղաքական դրսևորումներ են՝ անցանկալի, սխալ, բացասական, բայց կրկնում ենք՝ քաղաքական դրսևորումներ: Իսկ այն, ինչ փորձել են անել, հավանաբար, մյուս թեկնածուների համակիրները, պարզապես ստորություն է։ Այս պարագայում արդեն կարևոր էլ չէ, թե կոնկրետ ո՞ր թեկնածուի մտահղացումն է կնոջ անձնական կյանքը կամ անկողինն ի ցույց դնել հասարակությանը:
Միայն իր իսկ արժանապատվությունից զուրկ մարդը կարող է նման քայլի դիմել, և այն էլ այն դեպքում, երբ, կրկնում ենք, իրականում տեսանյութում Դիանա Գասպարյանը չէ: Դա մի կողմից: Մյուս կողմից էլ՝ այս երևույթը ինքնին գցում է նաև մյուս թեկնածուների վարկանիշը, քանի որ ոչ մի իրեն հարգող տղամարդ թույլ չէր տալու այդպես անարգել կնոջը՝ անկախ նրանից, թե ինչպիսին է նա, ով է նա: Եթե անգամ այդ թեկնածուներից որևէ մեկը չէր նախաձեռնողը, ապա առնվազն գոնե պետք է հանդես գային պաշտպանական հայտարարությամբ:
Ի վերջո, թեկնածուներից ոչ ոք ապահովագրված չէ, և երաշխիք չկա, որ վաղը հենց նրանցից որևէ մեկին մերկացնող տեսանյութ չի հայտնվի համացանցում՝ հենց նույն ձեռագրով: Թե՞ մյուս թեկնածուներն այնքան սուրբ են, որ մտահոգվելու բան չունեն և կարող են տղամարդուն ոչ հարիր պահվածք դրսևորել՝ լկտիաբար կողքից ծիծաղելով և ոչ մի քայլ չձեռնարկելով դրա դեմ:
Այնպես որ, կատարվածը մեկ սանդղակով բարձրացրեց Դիանա Գասպարյանի ընտրվելու հնարավորությունը, քանի որ տաբատ հագնելով տղամարդու արժանապատվություն ձեռք չեն բերում: