Չտեսները մսխելով հյուծում են երկիրը
NEWSPRESS.am-ը որոշ ժամանակ առաջ հրապարակել էր տեղեկություն այն մասին, որ Պետական վերահսկողության ծառայության պետ, ֆեյսբուքի աստղ և ստատուսի գծով առաջատար մասնագետ Դավիթ Սանասարյանի պաշտոնի գլխին կուտակված ամպեր կան:
Բանն այն է, որ սրվել էին պետի ու տեղակալի հարաբերություններն այն աստիճան, որ Սանասարյանին մեկ շաբաթ ժամանակ էր տրվել Նիկոլ Փաշինյանից` կա՛մ հեռանալ, կա՛մ հաշվի նստել տեղակալ Հայկ Սարգսյանի հետ, ով Փաշինյանի մտերիմն է արդեն երկար տարիներ: Սանասարյանն այդ ընթացքում մի կողմ դրեց իր ամբիցիաները և այդ կերպ մնաց իր պաշտոնին: Դե ո՞վ չէր գնա այդ քայլին՝ հանուն լայն հնարավորություններ տվող պաշտոնի:
Այսօր արդեն մամուլը գրում է այն մասին, որ Սանասարյանն ու առաջին «բորտի» մեծ սիրահար, փոխվարչապետ Արարատ Միրզոյանը (սիրում է, երբ իրեն ԱՌԱՋԻՆ փոխվարչապետ են ասում և ընդգծում իր առավելությունը) Արմեն Գրիգորյանի հոր հուղարկավորությանը մասնակցելու նպատակով Ստեփանակերտ ուղղաթիռով են գնացել: Մամուլը գրում է նաև, որ սույն պաշտոնատար անձինք հանկարծ փոշմանել են ու հրաժարվել նախօրոք պլանավորված կերպով Ստեփանակերտից ավտոմեքենաներով մեկնել Մարտունի, ուր ապրում էին Գրիգորյանի ծնողները: Խոսքը, ի դեպ, մոտ 55 կմ ճանապարհի մասին է: Նրանք պնդել են, որ այդ կարճ ճանապարհահատվածը ևս անցնեն ուղղաթիռով, ինչը բավական բարդություններով ապահովվել է:
Այսպիսի իրավիճակ է ստեղծվում, երբ պաշտոնի են նշանակվում «չտեսները», իսկ երբ գալիս է մսխելու երանելի պահը՝ սկսում են աջ ու ձախ օգտվել տրված հնարավորություններից։
Արարատ Միրզոյանի՝ Դուշանբե՝ առաջին բորտով թռիչքից հետո այնքան քննադատություն հնչեց, որ թվում էր՝ այդ արատավոր երևույթն ի վերջո կվերանա, բայց արի ու տես՝ մարդկանց դուր է եկել նոր իրավիճակը և ոչ մի կերպ չեն ուզում հրաժարվել ճոխություններից։
Այս և նմանատիպ չհիմնավորված ծախսերը պետք է սուր քննադատության արժանան. հանրությունը չպետք է թույլ տա իր մուծած հարկերի շնորհիվ սանասարյանամիրզոյանական «թայֆեն» երկիրն իրենց հյուրատունը դարձնի։ Պետք է ստիպել՝ հարգել պաշտոնը և օրենքի տառին համապատասխան աշխատել։