«Նիկոլ Փաշինյանը փուռն է տալիս իր այսօրվա դաշնակիցներին». Աշոտյան
Միակ բանը, որ ստացվել է Նիկոլ Փաշինյանի մոտ՝ ՀՀԿ-ի դեմ պայքարելն է։ Այս մասին լրագրողների հետ զրույցում ասել է ԱԺ ՀՀԿ խմբակցության պատգամավոր Արմեն Աշոտյանը՝ արձագանքելով վարչապետի հայտարարությանը, թե որոշ ուժեր իրենց հեղափոխության պաշտպան են ներկայացնում, բայց թաքուն բանակցում են ՀՀԿ-ի հետ։
Նրա խոսքով` վարչապետ Փաշինյանն անգամ այն ժամանակ է պայքարում ՀՀԿ-ի դեմ, երբ ՀՀԿ–ն չի մասնակցում ընտրություններին։
«Կարծում եմ՝ երկրի վարչապետից հասարակությունը Նիկոլ Փաշինյանից ավելի մեծ ակնկալիքներ ունի, քան նախորդ իշխանությունների դեմ հավերժական պայքարն է»,-ասում է Արմեն Աշոտյանն ու հավելում, որ եթե որևէ քաղաքական ուժին սատարող նախկին ՀՀԿ–ականներ կան, ապա նրանք ամենաշատը հենց «Իմ քայլը» դաշինքի շտաբերում են։
Բացի այդ, Աշոտյանը նաև նկատում է, որ այդ հայտարարությամբ Փաշինյանը, իր լեզվով ասած, «փուռն է տալիս իր այսօրվա դաշնակիցներին»:
«Ակնհայտ է, որ այդ ակնարկը վերաբերում էր այսօր կառավարության մաս կազմող տարբեր քաղաքական ուժերին: Բայց ակնհայտ է, որ դա Հանրապետական կուսակցությանը չէր վերաբերում: «Ելք»-ից ինձ հետ ամենահաճախը շփվում է Նիկոլ Փաշինյանը՝ տարբեր միջազգային ֆորմատներով, նաև` իր նախաձեռնությամբ: Բայց ակնհայտ է, որ Նիկոլ Փաշինյանը փուռն է տալիս իր քաղաքական դաշնակիցներին և պատրաստ է ամեն ինչ անել, որպեսզի ապահովի իր թեկնածուի համար առավելագույն այն ձայները, որոնք իրեն լրացուցիչ թև ու թիկունք կտան արտահերթ խորհրդարանական ընտրություններ կազմակերպելու համար»,-ասաց Աշոտյանը։
Նկատառմանը, թե գուցե նկատի ուներ «Ելք»–ից ուժերին, նա նշեց, որ «Ելք»–ից ամենահաճախն իր հետ շփվում է հենց Նիկոլ Փաշինյանը տարբեր ձեւաչափերով, «նաեւ իր նախաձեռնությամբ՝ ընդգրկելով ինձ տարբեր ձեւաչափերի մեջ»։
Աշոտյանի համոզմամբ՝ ակնհայտ է, որ Փաշինյանը ամեն ինչի պատրաստ է իր թեկնածուի համար առավելագույն ձայներ ապահովելու ճանապարհին։