Վտանգավոր աշխատանք, չնչին աշխատավարձ, անհարմարավետ վրանային պայմաններ․ ՊՆ-ն անուշադրության է մատնել ականազերծողներին (լուսանկարներ)
Արդեն մի քանի տարի ՀՀ պաշտպանության նախարարության Էջմիածնի սակրավորների (ականազերծող) ինժեներական զորամասում վիճակն անմխիթար է։
NEWSPRESS.am-ի տեղեկություններով՝ զինծառայողներն իրենց ծառայությունն իրականացնում են ցածր աշխատավարձով ու անբարենպաստ պայմաններում։
Համագործակցության շրջանակում սարկավորները գործուղվում են տարբեր տարածքներ, ուր կան ականներ, հետեւաբար, պայթյունի վտանգ։
Ընդարձակ սահմանամերձ տարածքներում ականներ հայտնաբերելն ու դրանք վնասազերծելը որքան էլ լուրջ վտանգ է ներկայացնում ու անհնարին թվում, այնուամենայնիվ, այս գործին լծված զինծառայողները հաջողում են։ Բայց նրանք իրենց կատարած աշխատանքի դիմաց ստանում են օրական 1160 դրամ, իսկ 15 օր սահման պահելու դեպքում՝ 15 000 դրամ։
Հարկ է նկատել նաև, որ զինծառայողները մշտապես իրենց աշխատավարձով են սնվում, քանի որ ՊՆ տրամադրած սնունդը չի բավականացնում առողջ ու մարտունակ տղամարդկանց՝ նորմալ սնվելու համար։ Եվ ստացվում է, որ գրեթե առանց աշխատավարձի են ծառայում։
Այս ամենից բացի, զինծառայողները մնում են վրանների մեջ։ Անձրևների ժամանակ ամբողջ տարածքը ճահճանման ջրափոսերի է վերածվում, ու զինծառայողները տառացիորեն հայտնվում են ցեխի մեջ։
Ավելորդ է նաև նշել, թե ինչպիսի անհարմարություններ են առաջացնում նման պայմանները՝ պայթյունավտանգ տարածքն ականազերծած ու գործուղումից հոգնած վերադարձած զինծառայողների համար․ դժվարանում են նաև անձնական հիգիենիայի պահպանելու հարցում։
Եվ այսպես արդեն մի քանի տարի։
Մեր տեղեկություններով՝ տարածքում կան բնակելի շենքեր, որտեղ կարող են տեղակայել զորամասը, սակայն, չգիտես ինչու, ոչ ոք այս հարցով չի զբաղվում, ոչ մեկին սակրավորների աշխատանքը չի հետաքրքրում, ու նրանց վիճակով ոչ ոք մտահոգված չէ։
Վերջին շրջանում էլ զորամասը միավորել են խաղաղապահների հետ, և թվում էր, թե հարցը վերջապես կլուծվի, սակայն սակրավորներն ինչպես եղել, այնպես էլ մնում են վրաններում։
Մեր աղբյուրի տեղեկացմամբ՝ զինծառայողները մի քանի անգամ փորձել են հարցը բարձրացնել, սակայն նրանց պատասխանել են, թե՝ «դիմում գրեք, գնացեք»։
«Հա, էլի գնան, բայց աշխատելու տեղ չունեն էդ մարդիկ․ սա գոնե պետական աշխատանք է, գիտեն, որ էլի լավ-վատ, ժամանակին ստաբիլ գումար են ստանում»,-ասում է մեր զրուցակիցը։
Հ․Գ․ NEWSPRESS.am-ին են դիմել խնդրով մտահոգված մի շարք շահագրգիռ մարդիկ, ովքեր խնդրել են Պաշտպանության նախարար Դավիթ Տոնոյանի ուշադրությունը սևեռել հարցին։ Մեր կայքը հետևողական կլինի, որպեսզի հարցը շուտափույթ արձագանք ստանա։