Առաջին անգամ Նիկոլին դուխով մերժեցին
Նիկոլ Փաշինյանը վերջին երկու օրերին թեժ հանդիպումներ է ացկացնում. նախօրեին նա Սյունիքի մարզում էր, իսկ այսօր, ահա, այցելել է Ամուլսար: Վարչապետը որոշել է երկար լռությունից հետո արձագանքել երկրում վերջին շրջանի թիվ մեկ սկանդալային խնդրին՝ Ամուլսարի ոսկու հանքի շահագործմանը, և իր ոճին հավատարիմ, որոշել է գնալ ու շփվել իր նման փողոցից տուն չգնացող ակտիվիստների հետ: Սակայն, ինչ իմանար Ձերդ գերազանցություն վարչապետը, որ ակտիվիստներից այսօր ստանալու է հեղափոխությունից հետո առաջին հարվածը:
Ակտիվիստների և «Լիդիան Արմենիա» ընկերության ներկայացուցիչների հետ Ջերմուկում հանդիպման ժամանակ վարապետն առաջարկեց Ամուլսարի ոսկու հանքի հարցը լուծել բացառապես փաստերի հիմքով և նշեց. «Գուցե, ամեն ծառն ինձ համար ավելի շատ թանկ է, բայց վարչապետի կարգավիճակում պետք է լինեմ հավասարակշռված»։
Ավելին՝ Փաշինյանն ասաց, որ ոսկու հանքի շահագործման դեմ հանդես եկող մարդիկ ցանկանում են ստեղծել ինչ-որ սիտուացիա և շատ կոնկերտ ակնարկեց, որ այս շարժումը ոչ այնքան բնապահպանական, որքան քաղաքական ենթատեքստ ունի, ուստի շեշտեց.
«Եթե մենք այս իրավիճակում որևէ ապօրինություն անենք, եթե ոչ մեր տեսակետից, ապա գոնե միջազգային հարաբերությունների տեսակետից, կարող ենք շատ լուրջ խնդիրների առաջ կանգնել» ։
Նիկոլ Փաշինանը սրանով ակտիվիստներին հասկացրեց, որ չի ուզում միջազգային հանրության առաջ ամոթով մնալ, քանի որ «Լիդիան Արմենիա» ընկերությունը հանքի փակումը Կառավարության քթից կհանի, էլ չասենք, որ գուցե դրանից հետո Հայաստանի բիզնես վարկանիշը կտրուկ նվազում արձանագրի:
Փաշինյանը հեռատես է: Նա չէր կարող այս փուլում գնալ նման կտրուկ ելքերի, դրա համար էլ փորձեց ժամկետներ ձգել՝ նոր փորձաքննությունների մասին իր խոստումներով:
Սակայն այսօրվա հանդիպումից ակնհայտ է, որ բնապահպան ակտիվիստները չհավատացին Նիկոլին, նրան դուխով ասացին ոչ՝ խոստանալով իրենց պայքարը շարունակել նոր թափով:
Փաստորեն, այսօր առաջին անգամ, վարչապետ Փաշինյանին իր հեղինակությունը չփրկեց. ստանալով առաջին ապտակը՝ նա հեռացավ Ջերմուկից առանց հստակ պայմանավորվածությունների, ձեռնունայն: