Արամի փողոցում վախով են քնում, քանի որ տունը կարող է փլվել ու ընկնել «ձորը» (լուսանկարներ)
NEWSPRESS.am-ն արդեն մեկ անգամ անդրադարձել է Արամի փողոցում մնացած մի քանի ընտանիքների ճակատագրերին, որոնք շարունակում են ապրել իրենց հին ու տաքուկ տներում ու չեն կարողանում համաձայնության գալ «Հին Երևան» նախագիծն իրականացնողների հետ, քանի որ նրանք առաջարկում են քիչ գումար, որով էլ անհնար է Կենտրոնում գնել բնակարան։
Շինարարական աշխատանքներն արդեն տևում են մոտ 5-6 ամիս ու այդ ընթացքում տարածքում մնացած մի քանի ընտանիքների տները քանդվում են, քանի որ մոտ 20 մետր խորությամբ փորված հիմքը թուլացրել է տարածքի ամրությունն ու արդյունքում տները կամաց-կամաց ճաքում են։ Մեզ հետ զրույցում տեղի բնակիչ Ջուլիետա Մկրտչյանը նշեց, որ իր տան արտաքին պատերից մեկը քանդվում է։
«Էս 20 մետրանոց հիմքը գնում է հենց իմ տան արտաքին պատին կպած։ Կարծես ձորի բերանին ապրելուց լինենք։ Գիշերները քնում ենք ու առավոտյան մեզ վրա հող է լցված լինում։ Տան պատերը ճաքում են։ Նստած ենք լինում ու մեր աչքի առաջ պատերը ճաքում են։ Այս ահռելի հիմքը փորել են ու հիմա ընդերքը թուլացել է։ Մի քանի ամիս է, որ քանդում են ու շինարարությունը սկսվել է, իսկ այս հատվածում դեռ ոչինչ չեն արել, քանի որ մենք ու ևս մի քանի ընտանիքներ չեն համաձայնվում այդ գումարին»։
Տիկին Ջուլիետան նշեց, որ դիմել են Երևանի քաղաքապետարանին ու շինարարներին, սակայն նրանք հարցին լուծում չեն տալիս։
«Քաղաքապետարանում ինձ ասացին, որ դիմեմ շինարարներին։ Ես դիմեցի շինարարներին, իսկ նրանք էլ ասացին, որ կատարում են պատվիրատուի գործը։ Իսկ նախագծի պատվիրատուն սփյուռքահայ մեծահարուստ Վարդան Սիրմակեսն է, ում հետ կապ չենք կարող հաստատել։ Շինարարներն էլ ասացին, որ դիմենք դատարան և նրանք կգան պատը կամրացնեն, սակայն ինչպե՞ս ամրացնեն, երբ տան պատի տակով 20 մետրանոց ձոր է իջնում։ Ես ինքս տեսել եմ այդ նախագիծն ու շատ եմ հավանել, բայց պետք է մեզ էլ նորմալ բնակարան տան, որ դուրս գանք։ Ես այլ ակնկալիք չունեմ։ Միայն ուզում եմ բնակարան տան, քանի որ Կենտրոնում 1 մետր քառակուսու համար 650 դոլարը դա շատ քիչ գումար է։ Երեխաներս վախով են քնում այդ սենյակում։ Մտածում ենք կգնենք ու առավոտյան տունը կփլվի։ Այսպիսի վիճակ է նաև մեր հարևանների մոտ»։
Հավելենք նաև, որ տարածքում գտնվող գրեթե բոլոր տներում էլ ճաքեր էին առաջացել ու հիմքի կողմում գտնվող պատերը հեռացել էին տան մյուս հիմնական պատերից։ Փողոցի բակում մնացած բոլոր ընտանիքներն ակնկալում են ստանալ իրենց տանը համապատասխան բնակարան Կենտրոնում, կամ էլ ավելի բարձր գումար, քան՝ 650 դոլարը։