Եթե այսօր սպառենք մեր ձկնային պաշարները՝ վաղը մեր երեխաները կզրկվեն դրանցից օգտվելու հնարավորությունից
Գիտությունների ազգային ակադեմիայի Հիդրոէկոլոգիայի և ձկնաբանության ինստիտուտի տնօրեն Էվելինա Ղուկասյանը ձկների աճի առումով բավականին լավ միտում է տեսնում։ Այդ մասին նա ասաց լրագրողների հետ հանդիպման ժամանակ։
Նրա խոսքով՝ վերջին 3-4 տարվա ընթացքում ձկնային ռեսուրսները Սևանում գնալով ավելանում են, իսկ խեցգետնինը՝ հակառակը՝ գրեթե կրկնակի նվազել են։ Ուսումնասիրությունների արդյուքնում պարզվել է նաև, որ ընդհանուր պաշարները կազմում են մոտ 2300 տոննա, որից 2200–ը բաժին է ընկնում սիգին։
«Իհարկե, այդ բոլոր ձկներն արդյունագործական նշանակության չեն։ Արդյունագործական պաշարները սիգի դեպքում հավասարվել է մոտ 554 տոննայի, ծածանը կազմում է մոտ 47 տոննա, իսկ իշխանի պաշարները տատանվում են 15-17 տոննայի սահմաններում»,- նշեց Էվելինա Ղուկասյանը։
Նրա պնդմամբ՝ Սևանից ձկների և խեցգետինների արդյունահանումը պետք է դեռևս արգելվի, քանի որ այդ պաշարը կարող է անմիջապես սպառվել։ Էվելինա Ղուկասյանի դիտարկմամբ, հարկավոր է հասնել նվազագույնը՝ 1000 տոննայի շեմին և միայն դրանից հետո կազմակերպել կանոնավոր ձկնարդյունահանում։
«Այս մասին պետք է մտածի նաև Սևանի ավազանի բնակչությունը, որովհետև սա նրանց ապագա սերունդների բարեկեցության խնդիրն է։ Եթե այսօր ամբողջովին սպառվեն այդ ռեսուրսները, վաղը նրանք իրենց երեխաներին զրկում են դրանցից օգտվելու հնարավորությունից»,- ասաց նա։
Անդրադառնալով ձյան սակավության հետևանքով առաջացած խնդիրներին՝ նա նկատեց, որ այս տարվա եղանակային պայմանները բնության համար բարենպաստ չէին։
«Ջրամբարներում ջուրը շատ քիչ է, եթե երաշտային վիճակ լինի, բնականաբար նորից կանդրադառնան Սևանա լճի բացթողումների հարցին։ Սա, իհարկե, ցանկալի չէ, քանի որ ցանկացած իջեցում բացասաբար է անդրադառնում էկոհամակարգի վրա»,-եզրափակեց բանախոսը։