Թուրքիան օկուպացրել է Սիրիան. արևելագետ
Թուրքիան շարունակում է իր ագրեսիան Սիրիայի դեմ, դա շարունակում է՝ ընդլայնելով իր գործողությունների շրջանակները, ստանալով աջակցություն ԱՄՆ-ից և ՌԴ-ից: Այսօր լրագրողների հետ հանդիպման ժամանակ ասաց արևելագետ, ՀՀ ԳԱԱ Արևելագիտության ինստիտուտի տնօրեն Ռուբեն Սաֆրաստյանը:
Ըստ նրա՝ Թուրքիան սկսում է իր պահանջները, վերջնագրերը ներկայացնել նաև այլ տարածքների նկատմամբ: Թուրքիան արդեն վերջնագիր է ներկայացնում Իրաքի ներկայացուցիչներին՝ պահանջում, որ Հյուսիսային Իրաքից դուրս բերվեն Իրաքյան Քրդստանի բանվորական կուսակցության ներկայացուցիչները:
«Նա հարևանների հետ խոսում է վերջնագրի լեզվով, օկուպացրել է Սիրիայի տարածքի մի մասը, հանդես է գալիս ամենաբարձր մակարդակով իր սպառնալիքներով, վերջնագրերով, պատահական չէ, որ Էրդողանն անընդհատ կրկնում է՝ իրենք պետք է շարունակեն իրենց նպատակին հասնել և ոչ մի բանի առաջ կանգ չեն առնելու»,- ասաց Ռ. Սաֆրաստյանը:
Արևելագետը շեշտեց, որ Թուրքիան օկուպացրել է Սիրիայի մի մասը, և Թուրքիայի ագրեսիվ քաղաքականությունը չի հանդիպում պատնեշների: Նման իրավիճակը Սաֆրաստյանը բացատրում է նավթահորերի հսկողությամբ և դրանով պետք է բացատրել Սիրիայում տեղի ունեցող իրադարձությունները: