Պատասխանատուն թրեյդե՞րն է, թե՞ Teletrade-ը. խաբված ներդրողները փաստի առաջ են կանգնել
Teletrade D.J. Limited ընկերությունը ներառված է TeleTrade ընկերությունների խմբի կազմում, որը բրոկեր է և ներկայացնում է թրեյդինգին հասանելիություն և ֆինանսական խորհրդատվության ծառայություններ ֆինանսական շուկաների ոլորտում:
Ներկայիս «Արմլեվել» (նախկին Teletrade) ՍՊԸ-ի երկու տասնյակի հասնող ներդնողները կորցրել են իրենց գումարները։ Աղմկահարույց այս պատմության հարցն արդեն մեկ տարի է` ծեծվում է, բայց այդպես էլ չի լուծվում։ Կազմակերպության ղեկավարները մեղադրում են գործարքն իրականացրած թրեյդերին, նա էլ՝ ղեկավարներին։ Արդյունքում տուժում է ներդրողը, տվյալ դեպքում՝ շարքային քաղաքացին։
«Քանի որ դուք անփորձ եք, շատ արագ կկորցնեք ձեր գումարները, ավելի լավ է մեր աշխատակիցը տնօրինի ձեր գումարները, որի դիմաց ամսական 10 տոկոսի չափով գումար կստանաք։ Այս կերպ են մեզ համոզել ընկերության աշխատակիցները գումար ներդնել»,- NEWSPRESS.am-ի հետ զրույցում ասաց ներդրողներից Գևորգ Պողոսյանը։
«1400 դոլար եմ ներդրել, ամիսների ընթացքում այն հասավ 1800-ի, որից հետո միանգամից մինուս գնաց»,- նշեց նա։
Նրա խոսքով՝ ընկերության հետ պայմանագիր չեն կնքել, քանի որ ընկերությունն ասել է, որ իրենք թրեյդերի հետ չեն կարող պայմանագիր կնքել, բայց վերջինս ունի ֆինանսական գործարք կատարելու բոլոր լիազորությունները: Երբ պարզ դարձավ, որ գումարները զրոյացվել են, տուժողները դիմել են Teletrade-ի տնօրինությանը, հասկանալու՝ ի վերջո, ի՞նչ է կատարվել, ինչո՞ւ են կորցրել իրենց գումարները, այն դեպքում, երբ դասընթացների ժամանակ իրենց հավաստիացրել են, որ գումար կորցնելու հավանականությունը զրո է: Հարցին՝ ո՞վ է պատասխանատու գումարների փոխհատուցման համար, տնօրինությունը պատասխանել է, որ ֆինանսական շուկան (բորսա) անկայուն է եղել, ինչի արդյունքում գումարները մինուս են գնացել։
Գործադիր տնօրեն Արթուր Վարդանովն էլ NEWSPRESS.am-ի հետ զրույցում ասաց. «Պատասխանատուն թրեյդերն է՝ Քրիստինե Բալաբեկյանը, նրանից էլ թող պահանջեն»։ Մեր հարցին, թե տնօրինությունն, արդյո՞ք, պատասխանատվություն չի կրում սխալ գործարքների և դրանց հետևանքով կորցրած գումարների համար, չէ՞ որ Քրիստինեն առանձին չէր կարող գործել, նա ընկերության անունից է կատարել այդ գործարքները, Արթուր Վարդանովը պատասխանեց․ «Քրիստինեից թող պահանջեն իրենց գումարները»։
Հետագայում ներդրողները պարզել են, որ Քրիստինե Բալաբեկյանը, գործարքները տանուլ տալուց հետո, դուրս է եկել աշխատանքից՝ հրաժարվելով տուժածներին փոխհատուցելուց, քանի որ, ըստ նրա, մեղավորը Teletrade ընկերության ղեկավարությունն է։ Որոշ ժամանակ անց նրա հեռախոսահամարը դարձել է անհասանելի:
«Ես 900 դոլար եմ ներդրել։ Մեզ համոզեցին, որ Քրիստինեն շատ լավ թրեյդեր է, որ մեզ համար հավելյալ գումար կապահովի, մենք էլ հավատացինք ու «Հայբիզնեսբանկում» Teletrade-հաշվին գումար փոխանցեցինք»,- NEWSPRESS.am-ի հետ զրույցում պատմեց տուժող Ոսկի Նազարյանը։
Նա նշեց, որ իրենք մի քանի հոգով դիմել են ոստիկանություն, բայց ոչ մի արդյունք չի եղել, գործը կարճվել է։ Նրանց բազմաթիվ հեռախոսազանգերը մնացել են անպատասխան։ Դրանից հետո նորից են գնացել ոստիկանություն և այս անգամ բազմաթիվ քաշքշուկներից հետո, ի վերջո, գործը հասել է դիվանբաշուն՝ Կենտրոնի և Նորք-Մարաշի դատախազություն։
Գործի մանրամասներին ծանոթանալու նպատակով փորձեցինք կապ հաստատել դատախազ Անդրանիկ Սիմոնյանի հետ, բայց նրա հեռախոսահամարը անընդհատ «զբաղված էր»:
«Հայբիզնեսբանկից» էլ տեղեկացանք, որ, այո, նման հաշվեհամար գոյություն ունի, իրենք փոխանցել են գումարն ընկերության հաշվեհամարին։ Բայց հանելուց հետո ու՞ր է գնացել փողը, իրենց հայտնի չէ։
Ներդրողների պնդմամբ, երբ գումարները սկսել են մինուս գնալ, ընկերության մենեջեր Անժելիկա Սարգսյանը համոզել է նրանց գումարները բանկից տեղափոխել ընկերության ֆինանսական ֆոնդին, որտեղ ավելի արագ ու հեշտ կլինի հետ բերել փողը: Ներդրողները լսելով մենեջերին՝ գումարը փոխանցել են Teletrade-ի հաշվին, ինչն էլ, նրանց խոսքով, ընկերությունը «մեջ-մեջ» է արել։ Ի դեպ, Անժելիկա Սարգսյանը ևս չպատասխանեց մեր զանգերին: