Ո՞ւմ է խանգարում հայկական խնձորը
Վարչապետ Կարեն Կարապետյանը մարտի 3-ին այցելել է Արագածոտնի մարզ` ծանոթանալու 2017 թ. մարզի և համայնքների զարգացման ծրագրերի շրջանակում ըստ ոլորտների իրականացված միջոցառումների արդյունքներին և 2018 թ. անելիքներին:
Արագածոտնի մարզպետ Աշոտ Սիմոնյանը խոսել է հանրապետության համախառն ներքին արդյունքի ցուցանիշի, առևտրաշրջանառության, շինարարության ծավալի, ներդրումների և այլնի մասին։
Խոսք չի եղել մարզում ստեղծված բարդ իրավիճակի վերաբերյալ, որն առնչվում է խնձորի արտահանմանը։
Արդեն 11 օր է՝ մրգով բեռնված մեքենաները կանգնած են Լարսի անցակետում, ռուսական կողմը թույլ չի տալիս հայկական մրգի մուտքը ՌԴ՝ պատճառաբանելով, որ բանանի արկղերով են տեղափոխում՝ չնայած գյուղերից արտահանվող միրգը մինչ այդ էլ էր բանանի արկղերով տեղափոխվում։
Ռուսական կողմը նախ ասել է՝ թուրքական միրգ է, հետո՝ պարսկական։
Նշենք, որ այս տարիներին, երբ թուրքական պտուղ-բանջարեղենն արգելված էր ներկրել ՌԴ, որոշ հայ «ճարպիկներ» Թուրքիայից ներկրում էին բանջարեղեն և վերաարտահանում ՌԴ՝ հայկականի անվան տակ։ Ռուսական կողմից զարմանքով նշել էին նման մեծաքանակ լոլիկ ունենալու հանգամանքը, հայկական կողմը ներկայացրել էր ջերմոցների ծավալը․ կարճ ասած՝ «տակից դուրս էին եկել»։
Կա նաև մեկ այլ դեպք, երբ ՌԴ-ն արգելեց հայկական որոշ ձուկ արտադրողների ձկնամթերքի մուտքը ՌԴ․ այստեղ դարձյալ հայ որոշ «ճարպիկների» մատն էր խառը․փորձում էին որոշ ձուկ արտադրողներից «փայ» ստանալ։
Քանի որ դեռևս հայկական խնձորի վերաբերյալ նորություն չկա, նշենք մի քանի հանգամանք: Նախ չի բացառվում, որ «ասվել է», որ խնձորը չթողնեն մտնի ՌԴ կամ խնձոր արտադրողներին են օգտագործում․ նման երևույթները ներկրման և արտահանման ժամանակ օրենքներ թելադրողների համար պարարտ հող են։
Իսկ այսօր տեղեկացնում են, որ վարչապետը կապի մեջ է ռուսական կողմի հետ՝ խնդրի առնչությամբ, իսկ դա այն ժամանակ, երբ օհանավանցիները փակել են ճանապարհը: Չէ՞ր կարելի ռուսական կողմի հետ բանակցել այն ժամանակ, երբ խնդիրը կար, ոչ թե սպասել, որ ճանապարհ փակեն, հետո սկսեն աշխատել։