Ծանր հրետանի 2. Շուշան Պետրոսյանը նոր թափով է «շինում» բանակը
Այսօր Ազգային ժողովում կրկին իր աշխուժությամբ աչքի է ընկել երգչուհի պատգամավոր Շուշան Պետրոսյանը: Նա հերթական անգամ իր մաղձն է թափել լրագրողների վրա՝ փորձելով իր կարևորությունն ընդգծել, երբ նրան հարցրել են իր նոր նախաձեռնության մասին՝ կապված բանակի առաջնագծի համար տուֆ առաքելու հետ։
«Էնպես չի, որ նորություն է: Ես վեց տարի անում եմ այս ծրագիրը։ Հատկապես վերջին երկու տարիներին բանակի հետ կապված շատ նախագծեր են եղել»,- տուֆ հավաքելու նախաձեռնության մասին լրագրողներին ասում է Շուշան Պետրոսյանը: Նկատենք, որ ամենօրյա լրահոսի մեջ գտնվելով՝ Շուշան Պետրոսյանի այս նախաձեռնության մասին երբևէ չենք լսել և կցանկանայինք այդ 6 տարվա տուֆի առաքման մասին Շուշան Պետրոսյանը փաստերով խոսեր:
«Հրապարակ»-ի լրագրող Վահե Մակարյանի հարցին, թե՝ ստացվում է, որ մենք Պաշտպանության նախարարություն չունե՞նք, որ անընդհատ ժողովրդի հաշվին փորձում ենք բանակին օգնել, այս պարագայում նախարարության գործառույթը ո՞րն է։
Այս հարցից երգչուհի պատգամավորն ակնհայտորեն նեղվեց ու անցավ «դու»-ի:
-Շատ վատն ա հարցը, կասկածու՞մ ես մեր բանակի վրա։
-Չեմ կասկածում։
-Ուրեմն մի հատ մարդավարի, հայ տղու նման հարցեր տուր։
-Հայ տղու նման ասում եմ՝ մեր նախարարը որտե՞ղ է, որ պետք է մենք․․․
-Չգիտե՞ս որտեղ ա։ Նախարարությունում։
-Նախարարությունում ի՞նչ է անում, որ մենք պետք է տուֆի փող հավաքենք, լվացքի մեքենա առնենք։
-Լսի, քեզնից ո՞վ ա տուֆի փող խնդրել, քեզնից էն էլ․․․
Այս նախաձեռնությունները և շուշանպետրոսյանական վարքագիծն օգնելու փոխարեն վնասում է բանակին: Բանակի մասին պետք է գործել բավականին զգույշ, գեղեցիկ, խնամված տեքստերով, ոչ թե այդ կեղծ հայրենասիրությամբ:
Ի դեպ, նման դրամահավաքությունների հիմքը դրեց հենց Պնախարար Վիգեն Սարգսյանը, ում բարձր հովանավորությամբ էլ կատարվում է այս ամենը և ով ասես փորձում է հանրության մեջ ինքնահաստատվել հենց բանակի հաշվին:
Սա ոչ այլ ինչ է, եթե ոչ բանակ չտեսած նախարարի կառավարման արդյունք: Հենց սա էր ակնկալվում դեռևս այն ժամանակ, երբ նորանշանակ նախարարին խիստ քննադատում էր հասարակությունը՝ պնդելով, որ նախարարը պետք է առնվազն պատերազմի բովով անցած լինի, որպեսզի նման տաշի-տուշի շոուների մեջ չներքաշվի և չարժեզրկի առանցքային այս ոլորտը:
Մի խոսքով՝ եկել է ժամանակը քաղելու այն պտուղները, որ մեզ տվեց սխալ նախարարի նշանակումը և հանդուրժելու շուշանպետրոսյաններին, ովքեր դրամահավաքություն են կազմակերպում և իրենց մեզանից մի աստիճան վերև դասում, թե մենք ի՞նչ ենք արել երկրի համար, տեսեք՝ իրենք ինչե՜ր են անում, բանակ են «շինում»: