Դեղատոմսով դեղերը հավելյար գումար աշխատելու միջոց է
Իշխանությունների քայլերը պետք է ուղղված լինեն հասարակության բեռը թեթևացնելուն, ոչ թե ավելացնելուն, իսկ դեղատոմսով դեղեր վաճառելով՝ կբարձրանա նաև դեղերի գինը։ Այդ է վստահեցնում «Հայ տնտեսվարողների և սպառողների իրավապաշտպան կենտրոն» ՀԿ նախագահ Արթուր Աթոյանը։
Նա լրագրողների հետ հանդիպման ժամանակ նկատեց, որ դեղատների աշխատողները ծանոթ-բարեկամ սկզբունքով բժիշկ կգտնեն, որպեսզի դեղատոմս տան, և իրենց առևտուրը չտուժի։
«Այս ամենը հավելյալ գումար աշխատելու միջոց է։ Դեղը, միանշանակ, կթանկանա, քանի որ դեղատունը, դեղը վաճառելուց բացի, նաև բժշկին պետք է փող տա, որ իրեն դեղատոմս տա»։
Բացի այդ նա նկատեց, որ բժշկի խորհրդատվության համար ևս վճարել է հարկավոր։
Սոցիոլոգ Ահարան Ադիբեկյանն էլ իր հաշվարկները ներկայացրեց՝ նկատելով, որ բժշկի խորհրդատվության վճարից խուսափելու համար, հասարակության 60-65%-ը դիմում է պոլիկլինիկա, մնացած 30-35%-ը դիմում է կա՛մ ծանոթներին, կա՛մ զբաղվում է ինքնաբուժությամբ։
Նա հաստատեց Արթուր Աթոյանի այն տեսակետը, որ բժիշկն ու դեղատան աշխատողը կարող են համագործակցել և արհեստականորեն թանկացնել դեղի գինը։
«Այսինք՝ կարող է բժշկին ասել, որ եթե վաճառքի թիվը մեծացավ, ապա բոնուսներ կտա բժշկին․․․ այսինքն՝ նոր կարգավորումը հավուր պատշաճի գործելու համար մեծ ազդեցություն ունեն բիզնեսը, գրագիտությունը և բժշկի բարոյական դիրքը»,- ասաց Ադիբեկյանը՝ հավելելով, որ, այնուամենայնիվ, «Դեղերի մասին» օրենքի կարգավորումներն անհրաժեշտ են, թեկուզ նրա համար, որ կանանց մեծ մասն այս դեղերով դիմում է ինքնասպանության։ Այնպես որ՝ ըստ Ադիբեկյանի՝ սա վերահսկողություն է, որը նա դրական է գնահատում։
«Ինձ մի թմրամոլ պատմեց, որ դեղատներում 50 դեղ կա, որից ինքը նույնիսկ տան պայմաններում կարող է թմրանյութ ստանալ․ այսինքն՝ վերահսկողությունը կարող է դրական ազդեցություն ունենալ»։