«Հրապարակ». Ի՞նչ են հայտարարագրել Սերժ Սարգսյանի եղբայրն ու Շառլ Ազնավուրը
«Հրապարակ» թերթը գրում է.
«Պաշտոնատար անձանց և նրանց փոխկապակցված անձանց՝ Բարձրաստիճան պաշտոնատար անձանց էթիկայի հանձնաժողով ներկայացված գույքի և եկամուտների հայտարարագրերն ուսումնասիրելիս պարզվում է, որ պաշտոնյաներից շատերն օրենքի խախտմամբ են ներկայացրել իրենց հայտարարագրերը:
«Հանրային ծառայության մասին» օրենքի պահանջն է՝ ներկայացնել ոչ միայն տարեկան, այլ նաև պաշտոնը ստանձնելու օրվա դրությամբ պաշտոնատար անձի գույքի և եկամուտների հայտարարագիր: Մասնավորապես՝ ՄԹ-ում ՀՀ արտակարգ և լիազոր դեսպան, ՀՀԿ նախագահի թեկնածու Արմեն Սարգսյանը հանձնաժողով չի ներկայացրել իր 2013 թ. տարեկան հայտարարագիրը, այլ միայն պաշտոնը ստանձնելու հայտարարագիրը, ինչի կապակցությամբ քաղհասարակության ներկայացուցիչներն օրերս իրենց մտահոգությունն էին հայտնել:
Նկատենք, որ ՀՀ հատուկ հանձնարարություններով դեսպան Լևոն Սարգսյանը հանձնաժողով է ներկայացրել միայն տարեկան հայտարարագրերը:
Նա պաշտոնավարում է՝ սկսած 2010 թվականից, սակայն հանձնաժողով է ներկայացրել իր հայտարարագրերը միայն սկսած 2014 թվականից: Դատելով դրանցից՝ Լ. Սարգսյանն ու նրան փոխկապակցված անձինք միայն աշխատավարձով են ապրում:
Նա 2014-ի հայտարարագրում ներկայացրել է միայն երկու տեղից ստացված եկամուտը՝ աշխատավարձի տեսքով՝ 4 մլն 758 հազար 372 և 2 մլն 487 հազար 589 դրամ: 2015-ին Սարգսյանը դարձյալ միայն աշխատանքի վարձատրություն կամ դրան հավասարեցված այլ վճարումներ է հայտարարագրել, որոնք ստացվել են երկու տարբեր տեղերից՝ 6 մլն 760 հազար 560 և 2 մլն 110 հազար 115 դրամ:
2016 թվականին նրա եկամուտներն աճել են՝ կազմելով 7 մլն 507 հազար 947 և 2 մլն 637 հազար 294 դրամ, որոնք գոյացել են դարձյալ աշխատավարձից կամ դրան հավասարեցված այլ վճարումներից: Նրա կինը՝ Արմինե Գումեդինի Հարությունյանը, նույնպես հայտարարագրել է աշխատավարձը, որը երեք տարվա կտրվածքով նույնն է՝ 2 մլն 300 հազար դրամ:
Նշենք, որ Ա. Հարությունյանը 1997-ից Մ. Վ. Մալայանի անվան ակնաբուժական կենտրոնում է աշխատում՝ բժիշկ-ակնաբույժ է: 2011-ից էլ աշխատում է Մխիթար Հերացու անվան բժշկական համալսարանի աչքի հիվանդությունների ամբիոնում՝ որպես դասախոս, ՀՀ ակնաբուժական ասոցիացիայի անդամ է:
Լ. Սարգսյանի դուստրը՝ Անի Սարգսյանը, որպես փոխկապակցված անձ, որևէ գույք և դրամական միջոց չի հայտարարագրել, միայն «այլ եկամուտ» 291,000.00 դրամ, սակայն, թե ինչ աղբյուրից է ստացվել եկամուտը՝ պաշտպանված է: 2016-ին Անի Սարգսյանը, որպես «այլ եկամուտ», հայտարարագրել է ընդամենը 60 հազար դրամ:
Նշենք, որ Լ. Սարգսյանը ՀՀ ԱԳՆ- ում է աշխատում՝ սկսած 1993-ից: Նա եղել է Հալեպում ՀՀ գլխավոր հյուպատոսը, տարբեր տարիների զբաղեցրել է ՀՀ արտակարգ և լիազոր դեսպանի պաշտոնը Սիրիայի Արաբական Հանրապետությունում, Հորդանանի Հաշիմյան Թագավորությունում, Թունիսում և Ալժիրում: Նա «Փյունիկ» հիմնադրամի հոգա¬բարձուների խորհրդի նախագահն է, հիմնադրամի գործադիր տնօրենը, կառույց, որը միլիոնավոր դոլարների հետ գործ ունի:
Նկատենք, որ Լևոն Սարգսյանը միակ դեսպանը չէ, որ խուսափել է պաշտոնն ստանձնելու օրվա դրությամբ ունեցած գույքն ու եկամուտները հայտարարագրելուց: ԱՄՆ-ում ՀՀ արտակարգ և լիազոր դեսպան Գրիգոր Հովհաննիսյանը նույնպես չի հայտարարագրել պաշտոնն ստանձնելու օրվա դրությամբ ունեցած գույքն ու ունեցվածքը:
Իսկ ահա Շվեյցարիայի Համադաշնությունում ՀՀ արտակարգ և լիզոր դեսպան Շառլ Վաղինակ Միքայելի Ազնավուրը, որը դեսպանի պաշտոնն ստանձնել է 2009-ի մայիսի 5-ից, հանձնաժողով ընդհանրապես չի ներկայացրել և ոչ մի հայտարարագիր»:
Մանրամասները՝ թերթի այսօրվա համարում