Զոյա Թադևոսյանի դուստր Դիանա Գալոյանը «ձեռքը գցել է փրփուրներին»․ ինչ է ծրագրել նա՝ ՀՊՏՀ-ում մնալու համար
Դեռ նախորդ տարի, NEWSPRESS.am-ն անդրադարձել էր խնդրին, ըստ որի` Հայաստանի պետական տնտեսագիտական համալսարանի (ՀՊՏՀ) ռեկտոր Դիանա Գալոյանն ԱՄՆ-ում մեղադրվել և պատիժ է կրել՝ գողություն կատարելու համար:
Սկանդալային պատմությունից հետո, շատերն սկսեցին բարձրաձայնել նրա ապօրինությունների մասին։ Իսկ արդեն երեկ, Oragir.News-ը հայտնեց, որ Դիանա Գալոյանն այս շաբաթ կհեռացվի զբաղեցրած պաշտոնից։
NEWSPRESS.am-ի աղբյուրները հայտնում են, որ Դիանա Գալոյանը «համառ պայքարի» է դուրս եկել և չի ուզում հանձնվել։
Մեր տեղեկություններով` նա չի ուզում հեռանալ բուհից ու համաձայն է անգամ մեկ այլ պաշտոնում մնալ այնտեղ։ Իհարկե, ըստ մեզ հասած լուրերի, նրա ծրագրում ընդգրկված է նաև այն, որ իր հավատարիմ ու շատ մտերիմ, ՀՊՏՀ ուսումնական աշխատանքների գծով պրոռեկտոր Արմեն Գրգորյանը նշանակվի ռեկտորի պաշտոնում։
Չի բացառվում, որ այդ դեպքում նա շարունակի բուհը ղեկավարել իր «հավատարիմ» ռեկտորի միջոցով։
Հետաքրքիրն այն է, որ այս գործում նա հույսը դնում է ոչ միայն իր մոր՝ ՀԱԿ անդամ Զոյա Թադևոսյանի երբեմնի կուսակցական ընկեր ՀՀ նախագահ Վահագն Խաչատուրյանի, այլև ՔՊ-ական Գևորգ Պապոյանի վրա, ով վերջերս նշանակվեց Էկոնոմիկայի նախարարի պաշտոնում։
Իհարկե պարզ չէ, թե վերջինս որքանով կարող է օգնել վատ համբավ տիկնոջը մնալ բուհում ու շարունակել աշխատել ուսանողների հետ, բայց, ինչպես ասում են, հույսը վերջինն է մեռնում ու Դիանա Գալոյանը «ձեռքը գցել է փրփուրներին»։
Արմինե Մկրտումյան