Փորձում են Նոյեմբերյանը ևս հանք դարձնել
Բաց երկնքի տակ թանգարան լինելու մասին միֆերը մեր երկրում օր օրի հոդս են ցնդում: Աղավաղված, անշուք ու անտեր Երևանից հետո վտանգի տակ է դրվում մարզերի չնաշխարհիկ բնությունը: Գալու է ժամանակ, որ հանքարդյունաբերությունն այնքան է խժռելու մեր դիտարժան լեռները, որ այլևս մեր երկրում հիանալու և վայելելու բնություն չունենանք: Բազմագույն ծաղիկներով ու աննկարագրելի գեղեցիկ բնությամբ հագեցած Նոյեմբերյանը ևս փորձում են տանել դեպի հանքարդյունաբերության ագահ երախ, որի պատճառով հնարավոր է ժամանակ գա Նոյեմբերյանը «Թեղուտ 2» դառնա:
Բանն այն է, որ այս օրերին համաձայն «Պոլիմետալ Արմենիա»-ի նախագծի` Ալավերդի և Շնող, Կողբ և Նոյեմբերյան համայնքների վարչական տարածքներում իրականացվելիք համալիր երկրաբանահետախուզության արդյունքներով ակնկալվում է հայտնաբերել ու գնահատել ոսկու, արծաթի, պղնձի, մոլիբդենի, կապարի և ցինկի հեռանկարային հանքայնացումներ: Աշխատանքները նախատեսվում է սկսել 2018-ի երրորդ եռամսյակում և ավարտին հասցնել 2021 թվականի երրորդ եռամսյակում: Աշխատանքների իրականացման տարածքի մակերեսը գնահատվում է 180 ք/կմ:
Այս նախաձեռնությունն, իհարկե, չարիք է՝ կախված այդ տարածաշրջանի բնության գլխին, որը չպետք թույլ տալ իրականություն դառնա:
Արդեն իսկ համացանցային change.org հարթակում ստորագրահավաք է սկսվել, որով ստորագրողները դեմ են արտահայտվում Նոյեմբերյանում հանքարդյունաբերական գործունեության ծավալմանը:
«Մենք համայնքի ապագան տեսնում ենք էկոտուրիզմի զարգացման մեջ, իսկ հանքարդյունաբերությունն ու էկոտուրիզմը համատեղելի ուղղություններ չեն»,-ասված է ստորագրահավաքի տեքստում:
Հուսանք, որ քաղաքացիական հասարակությունը, նոյեմբերյանցիներն ու քնած Բնախարարությունը թույլ չեն տա ինչ-որ մարդկանց հարստացման, նեղ շահերի համար վերացվի Նոյեմբերյանի բնությունը: