Ինչո՞վ են պայմանավորված վերջին օրերին Հայաստանում տեղի ունեցող ինքնասպանության դեպքերը․ պարզաբանում է հոգեբանը
Վերջին շաբաթների ու օրերի ընթացքում հայկական մամուլը քննարկում է ու լուսաբանում ինքնասպանության դեպքերը։ Ամեն ինչ սկսվեց Դավիթաշենում տեղի ունեցած դեպքից հետո, երբ կամուրջի տակ հայտնաբերել էին մոր ու 9-ամյա աղջկա դիերը։ Այդ դեպքից հետո մինչ օրս շարունակվում են քննարկումներն ու վերլուծություններն այն մասին, թե արդյո՞ք դա ինքնասպանություն էր, թե ոչ։
Վերջին 2 շաբաթվա ընթացքում զգալի շատացել են ինքնասպանության ու ինքնասպանության փորձերի դեպքերը։ Գրեթե ամեն օր լրատվական կայքերը ներկայացնում են ինքնասպանության կամ դրանց փորձերի նոր դեպքեր։ Այդ ամենի հետ մեկտեղ ոստիկաններն ու փրկարարները կանխել են ինքնասպանության մի քանի դեպք։
NEWSPRESS.am-ի հետ զրույցում հոգեբան Արմինե Սարգսյանը խոսեց հնարավոր այն պատճառների մասին, որոնցով պայմանավորված են վերջին շրջանում տեղի ունեցող ինքնասպանության դեպքերը։
«Փաստերը ցույց են տալիս, որ վերջին 15 օրվա ընթացքում շատացել են ինքնասպանության դեպքերը։ Այդ ամենը կարող է ունենալ մի շարք պատճառներ։ Առաջնային պետք է նշել, որ մեր հասարակությունը գտնվում է հոգեբանական ծանր վիճակում, իսկ այդ վիճակից նրանց հանելու համար պետք է հոգեբանական աշխատանք։ Իսկ փաստացի Հայաստանում հասարակության զգալի մասը նախ ծիծաղով է լսում հոգեբանին այցելելու մասին հորդորը ու դրա հետ մեկտեղ չկան նաև նյութական միջոցներ, որ մարդիկ այցելեն հոգեբանին։ Ես կարծում եմ, որ վերջին դեպքերը պետք է սթափեցնեն պետությանը ու նրանք այդ ուղղությամբ լուրջ աշխատանքներ տանեն, որ հոգեբանին այցելելու ծառայությունը հասանելի լինի բոլորին»։
Հոգեբանն ընդգծեց, որ եղանակը, սոցիալ-տնտեսական վիճակը ու սթրեսն ամենամեծ պատճառներից են, որ կարող են անդրադառնալ մարդկանց հոգեբանական աշխարհի վրա։
«Գարունն իր պայծառությամբ ու ջերմությամբ բարձրացնում է մարդկանց տրամադրությունը, սակայն իրականում գարնանը մարդիկ դառնում են ավելի խոցելի ու սթրեսային։ Այս ամենի հետ մեկտեղ ծանրանում է նաև սոցիալ-տնտեսական վիճակը, մարդիկ սկսում են ապրել ավելի վատ։ Իսկ պարտքեր ունեցող, գումար չունեցող մարդը չի կարող հոգեբանորեն լինել առողջ ու սա այն դեպքում, երբ գումար չկա։ Ես չեմ ցանկանում ինքնասպանության բոլոր դեպքերը կապել այս ամենի հետ, սակայն ցանկանում եմ մարդկանց ուշադրությանը հրավիրել, որ շատ ժամանակ չնչին թվացող երևույթներն ու իրադարձությունները կարող են մեծ հետևանք թողնել մարդու ներաշխարհի վրա, իսկ այդ ամենն էլ կարող է հանգեցնել ինքնախեղման, ինքնասպանության ու այլ դեպքերի։ Չպետք է ծաղրել ու մատների արանքով չնայել հոգեբանին ու հոգեբանի կատարած աշխատանքին։ Շատ ժամանակ մարդիկ իրենց երեխաներին չեն տանում հոգեբանի մոտ ու որոշ ժամանակ հետո, երբ փորձանք է պատահում, նրանք նոր հասկանում են, որ իրենց երեխայի մոտ կար լուրջ հոգեբանական խնդիր»։
Արմինե Սարգսյանը հավելեց նաև, որ հոգեբանները չեն կարող փոխել սոցիալ տնտեսական վիճակը, սակայն կարող են օգնել, որ մարդիկ հաղթահարեն ներանձնային դժվարությունները, չկանգնեն այն մտքի վրա, որ կյանքը կորցրել է իր իմաստը։