Հայտարարություններն այն մասին, որ հայերը Լեռնային Ղարաբաղից դուրս են եկել ռուս խաղաղապահների անգործության պատճառով, սխալ են. Լավրով
ՌԴ ԱԳ նախարար Սերգեյ Լավրովը սխալ է որակել հայտարարություններն այն մասին, թե հայերը Լեռնային Ղարաբաղից դուրս են եկել ռուս խաղաղապահների անգործության պատճառով։ Спутник, Говорит Москва, Комсомольская правда ռադիոկայաններին տված հարցազրույցում նա հիշեցրել է, որ երբ ստորագրվել է Ղարաբաղը որպես Ադրբեջանի մաս ճանաչելու և Ալմա-Աթայի հռչակագիրը ճանաչող փաստաթուղթը, դրանում ոչինչ չէր ասվում Ադրբեջանում հայ ազգային փոքրամասնության հատուկ իրավունքների ապահովման անհրաժեշտության մասին։
«Այս պարագայում սխալ է ասել, թե հայերն այնտեղից հեռացել են ռուս խաղաղապահների անգործության պատճառով»,-ասել է նա ու հավելել․ «Նիկոլ Վովաևիչ Փաշինյանն ասաց, որ իրենք գնահատում են այն, ինչ ունեցել են Ռուսաստանի հետ, դժվար է գերագնահատել այն, ինչ Ռուսաստանը արել է Հայաստանի անվտանգության, տնտեսության, ինքնիշխանության համար, և այն, ինչ եղել է և կա մեր հարաբերություններում, պետք է գնահատել։ Հուսով եմ, որ նա շփումներ կունենա Ռուսաստանի նախագահ Վլադիմիր Պուտինի հետ, որտեղ հնարավոր կլինի անկեղծ քննարկում ունենալ՝ առանց այն փաստարկների, որոնք բարձրացնում են մեր արևմտյան չարակամները»,- ընդգծել է Լավրովը։