«Ինձ տարբեր խողովակներով ինֆորմացիա են տրամադրել»․ Լոռու մարզպետը՝ Փաշինյանի հրաժարականը պահանջող բժշկին ազատելու մասին
«Ոչ նման բան չկա, ես Արտակ Եդոյանին նրա քաղաքական հայացքների համար չեմ ազատել աշխատանքից»։ Այդ մասին NEWSPRESS.am-ի հետ զրույցում ասաց Լոռու նորանշանակ մարզպետ Արամ Խաչատրյանը՝ անդրադառնալով Վանաձորի թիվ 3 պոլիկլինիկական հիվանդանոցի տնօրեն Արտակ Եդոյանի հայտարարությանն առ այն, որ մարզպետն իրեն ազատել է իր քաղաքական հայացքների համար։
Արտակ Եդոյանը խոստովանել է, որ միացել է վարչապետ Նիկոլ Փաշինյանի հրաժարականի պահանջին ու հայտնվել մարզպետի թիրախում։ Նա վստահեցրել է նաև, որ իր և մարզպետ Խաչատրյանի միջև անգամ այդ թեմայի շուրջ խոսակցություն է եղել․ «Իմ քայլը» խմբակցության նախկին պատգամավոր ու այսօր արդեն մարզպետ Արամ Խաչատրյանը Եդոյանից հետաքրքրվել է, թե ինչո՞ւ է դեմ Փաշինյանին։
Խոսակցություն եղել է, բայց ազատման պատճառը դա չէ։ Այդ մասին մեզ հետ զրույցում ասաց Խաչատրյանը։
«Դեռ երեկ՝ փետրվարի 17-ին պաշտոնապես գրություն եմ ուղարկել Արտակ Եդոյանին, որին նա ծանոթացել է»,-ասաց Արամ Խաչատրյանը։
Դիտարկամանը, որ Եդոյանն այսօ՛ր է հայտարարել, որ որևէ հիմք և պատճառ չկա իրեն ազատելու, Խաչատրյանն արձագանքեց․ «Ո՛չ, պարոն Եդոյանը երեկ իմացել է։ Կարող եմ միայն ավելացնել, որ պոլիկլինիկայում անառողջ մթնոլորտ էր»։
Հարցին, թե արդյոք Արամ Խաչատրյանի կողմից «անառողջ» որակումը վերաբերվում է պոլիկլինիկայի ներսում առկա քաղաքական հայացքներին, նա բացասական պատասխանեց։
«Ես ունեմ իմֆորմացիա, ինձ տարբեր խողովակներով ինֆորմացիա են տրամադրել։ Եթե պարոն Եդոյանին դուր չի եկել՝ իր խնդիրն է»,-ասաց Խաչատրյանը։
Մեր հարցին, թե ստացվում է, որ տնօրենին մարզպետը կարող է ազատել «օդում կախված» լուրերով՝ առանց լուրջ հիմնավորումների և փաստերի՞, վերջինս պատասխանեց, որ ինքը փաստեր ունի։
«Ես ունեմ հիմնավորումներ և փաստեր և օգտվելով իմ իրավունքից, օրենքով սահմանված կարգով, ես Եդոյանին ազատել եմ աշխատանքից»,-եզրափակեց Խաչատրյանը։
Հարկ է միայն նկատել, որ Խաչատրյանի նշած «անառողջ մթնոլորտը», մեղմ ասած, այնքան էլ հասկանալի չէր պոլիկլինիկայի մի քանի աշխատողների համար, որոնց հետ մեզ հաջողվեց խոսել, բայց ովքեր չցանկացան ներկայանալ։
Նրանք նշեցին, որ Եդոյանի աշխատանքից ազատումը պարզապես անակնկալ էր։
«Իրո՛ք, չէինք սպասում»,-ասացին մեր զրուցակիցները․․․
Ինչևէ․․․ մնում է հավելել, որ Արտակ Եդոյանը պատրաստ է պաշտպանել իր իավունքները և հարցերը լուծել դատարանի միջոցով։
Զրուցեց՝ Արմինե Մկրտումյանը