«Իմ քայլ»-ի կանանց սպառնում են բռնաբարել, հոգեբանական բռնության են ենթարկում... Յա', իրո՞ք. կյանքը բումերանգ է
Այն, որ տարիներ առաջ «Ելք» դաշինքի ձևավորումն արհեստական էր և շինծու, ոչ ոք չէր կասկածում։ Այս դաշինքի անդամներին գրեթե քարշ տալով մոտեցրին իրար ու բառիս ամենաիսկական իմաստով՝ խցկեցին Ազգային ժողով։ Վաղամեռիկ այս դաշինքի կյանքն ավելի կարճ էր, քան իրենք՝ դաշինքով ԱԺ խցկված պատգամավորներն էին կարծում։
Ճիշտ 2 տարի առաջ «թավիշը» դրոշակ դարձրած, «հանդուրժողականությունը» հոգում ու սերը սրտի մեջ, Փաշինյանն ու իր թիմը լքեցին դաշինքը, դուրս եկան փողոց ու դարձան այսօրվա իրավիճակի տերը․․․
Խոսելով հանդուրժողականությունից՝ այսօր իշխանությունը ներկայացնող ուժը անհանդուրժողականություն է դրսևորում, խոսում սպառնալիքի լեզվով, խոսելով քրեկան ենթամշակույթից ազատվելու մասին՝ այսօր այդ ուժը Ազգային ժողով է բերում այդ կեղտոտ ենթամշակույթը, խոսելով սիրո մասին՝ այսօր վարչապետ Փաշինյանն ու նրա թիմը ատելություն ու գաղջ է տարածում հասարաքաղաքական կյանքում․․․
Խորհրդարանում է հայտնվել փողոցի խաժամուժը, ով ոչ միայն երեկվա փողոցային վարք ու բարքի կրողն է, այլև այդ վարքն ու բարքը իր խորհրդարան բերողը, իսկ որ ամենավատն է՝ իրար հետ փողոցի բառապաշարով խոսացող պատգամավորներին անմիջապես հովանավորում ու դուխ է տալիս ինքը՝ Փաշինյան Նիկոլը։
Այս ամենի ապացույցն այսօրվա ծեծկռտուքն էր խորհրդարանում, ու դրան հետևած Փաշինյանի ելույթը․․․ Ծեծկռտուքը «Ելք»-ի նախկինների միջև էր, որոնցից մեկն այսօր իշխանական թևը ներկայացնող «Իմ քայլը» խմբակցության պատգամավոր Սասուն Միքայելյանն էր, մյուսը՝ խորհրդարանական ընդդիմության թևի ներկայացուցիչ, «Լուսավոր Հայաստան» խմբակցության ղեկավար Էդմոն Մարուքյանը․․․
Փաշինյանը իր ելույթում փոխանակ դատապարտելու կատարվածը, և պատգամավորական մանդատից զրկելու իրար գետնին տապալած ու իրար խփած պատգամավորներին, նա պարզապես հայտարարում է, թե այդ ամենը իրենց՝ իշխանության դեմ նախաձեռնված սադրանք է․․․
Փաշինյանը իր խոսքը հավանաբար ավելի սրտաճմլիկ դարձնելու և իրեն լսող հասարակությանը հերթական անգամ մանիպուլիացիայի ենթարկելու համար, հայտարարեց, թե այս ատելությունը հասել է մինչև անգամ նրան, որ իրենց խմբակցության կանանց են սպառնում․ նրանց սպառնում են բռնաբարել, որդիներին ծեծել ու էլի ինչ-որ սրտակեղեք ու սրտաճմլիկ բառերով նախադասություններ կազմեց՝ հանրությանը լսելի դարձնելու, թե իբր իրենք թիրախավորված են, իբր «Իմ քայլի» կանայք հոգեբանական բռնության են ենթարկվում և դա հեղափոխության դեմ է․․․
Այստեղ դասականը կասեր՝ յա՛, իրո՞ք․․․
Շատ շուտ մոռացավ Փաշինյանը, որ ճիշտ երկու տարի առաջ, հանրապետական կուսակցության կանայք հայտնվել էին այս նույն խաժամուժի թիրախում․․․ նրանց վիրավորում էին, մահվան ծաղկեպսակներ դնում նկարների առաջ, հայհոյում էին, քարեր նետում ապակիներին, փակում ճանապարհը․․․ դա հոգեբանական բռնություն չէ՞ր․․․
Մոռացե՞լ է Փաշինյանը, թե ինչպես էր ամբիոնի մոտ լացում ՀՀԿ-ական Արփինե Հովհաննիսյանը և խնդրում այդչափ ատելություն չդրսևորել, մոռացե՞լ է Փաշինյանը, թե իր երբեմնի գործընկեր լրագրող, այնուհետև պատգամավոր Մագարիտ Եսայանն ինչպես էր իրեն խնդրում, ու կոկորդը խեղդող արցունքները հազիվ պահելով ամբիոնի մոտից ասում, թե ինչպես են կեղեքում իրենց որդիներին․․․
Հիմա եկել ու ի՞նչ է ասում Փաշինյանը, որ սադրո՞ւմ են իրենց, որ անտելությո՞ւն են տարածում՝ կանանց սպառնալով, որ այդ ամենը հանդուրժողականություն և սե՞ր չէ․․․ այդ դեպքում ի՞նչի վրա էր կառուցված հեղափոխությունը, եթե խմբակցության կանանց ու աղջիկներին սպառնալը սեր ու հանդուրժողականություն չէ․․․ չէ որ հենց այդպես եկան իրենք իշխանության։
Ստացվում է, որ Նիկոլը հերքում է ինքն իրեն ու տալիս իր պատասխանը։
Այն, ինչ տեղի է ունենում այսօր Ազգային ժողովում, սոցցանցերում ու փողոցում, հեղափոխության արդյունքն է, այն հեղափոխության, որով մինչ օրս թավշյա պատրանք էին ստեղծել հասարակության մոտ ու փորձում էին համոզել բոլորին, թե սեր ու հանդուրժողականություն է՝ սեր ու հանդուրժողականություն․․․
Ու հիմա իմքայլական կանանց այդ նույն հասարակությունը սպառնում է սիրով բռնաբարել, հանդուրժողականությամբ ծեծել ու թավիշով փաթաթելով նետել աղբամանը, ինչպես դա եղավ երկու տարի առաջ․․․
Սա էր հեղափոխությունը․․․
Արմինե Մկրտումյան